Jef Diederen

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

Jef Diederen waor 'ne Limburgse kunssjilder en graficus. Hae ies gebore in Heerle in 1920 en op 26 mièrt 2009 gesjtorve in Amsterdam.
'ne Andere Sjef Diederen ies 'ne bekènde Limburgse zenger, gebore in Brokem bie Valkeberg.

Opleiding

Van 1939 tot 1943 deit ‘r de sjtadsacademie of Miedelbaar Kunsnijverheidssjoal in Mestreech. Hie lìèrt ‘r Pieter Defesche en Ger Lataster kènne. Nao de Twiède waereldoorlog maak ‘r zien sjtudie aaf aan de rieksacademie in Amsterdam. Sjtudiegenote zint hie neve Lataster Karel Appel en Corneille. Same mèt de diechter Bert Schierbeek deit ‘r in 1965 ’t projek De Val. In de jaore 60 weurt hae beneump tot docent sjildere en grafiek Kunsacademie van Den Bosch. Vanaaf de jaore 70 van de 20e ièw krieg hae de meugelikheid um, ouch op groat formaat, te sjildere in 't veurmalig atelier van de impressionis George Breitner. Diederen maak ouch väöl grafiek en daoneve glaas-in-loadvènstere.

Sjtiel

In ’t begin sjildert hae realistische landsjappe van Zuud Limburg, mèt de koel (mien) e.d. Later uut hae ziech op de grens van figuratie en abstractie. Hae neump dat zelf: á la Cezanne. Alhoewaal hae sóms weurt gerekend tot de Pos-Cobragroep of Amsterdamse Limburgersj haet Jef Diederen ziech noats aangesjlote bie ’n bepaalde groepering of sjtruiming. Zien werk weurt lyrisch-abstracte kuns geneump. Frankriek ies ’n brón van inspiratie (kesjtièle, kathedrale en historische figure) en daoneve poëzie, muziek en sociaal engagement.

Tentoansjtèllinge en projecte

1948 de ièrsjte groepstentoansjtèlling.
1954 expositie van gouaches, teikeninge en etse in Kesjtièl Hoensbroek. Ziene sjtiel neump ‘r zelf á la Cezanne.
1957 haet ‘r zien ièrsjte solo-expositie. Tièntalle exposities volge dan in binne-en boeteland.
1977 Euverziechsexpositie in Amsterdam in 't t Stedelijk Museum.
Jaore 90 (?): expositie, in museum Van Bommel van Dam in Venlo, van 'n serie werk op papier: de Indiane en de publikatie van de serie Palestijne
In 2008 krieg 't museum Van Bommel van Dam in Venlo 'n collectie werk van Jef Diederen gesjónke.