Janse Bagge Bend

Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Zösters, es te dit dialek sjpriks.

De Janse Bagge Bend is 'ne Limburgstaolege rockband oet Zöstere, veural bekind vaan hunnen einmaolege hit Sollicitere! oet 1983 en hun optrejje op Pinkpop datzelfde jaor. Ze waore woersjijnelek de ierste die popmuziek in 't Limburgs zoonge, en de twiede nao Normaal mèt nationaol succesvolle dialekpop.

Bezètting bewirk

De Janse Bagge Bend besteit oet:

  • Henk Steijvers, zaank, gitaar, moondörgel, mirliton
  • Peter Peters, gitaar
  • Thijs "De Kuus" van Toor, tósje
  • Wim Krijns, saxofoon
  • John Gerrits, trompöt
  • Ton Meisen, tromboon, slaagwerk, zaank
  • Hen Omloo, trompöt, tromboon
  • Hen Pustjens, basgitaar
  • Wil van de Biesen, slaagwerk

Ton Meisen en Hen Omloo höbbe ieder in de WW-Band gespäöld.

Biografie bewirk

Janse Bagge Bend begós in de jaore zeveteg es zate hermenie oonder de naom Aspro Broesj. Diverse leie hadde ieder gespäöld in Carboon, 'ne gelegenheidsband dee 'n plaat maakde euver de zjus geslote kojle.[1] De groop zaot geworteld in 't links joongerecircuit. In 1979, nao e konzèr vaan d'n Acherhookse band Normaal in Zöstere,[2] make ze d'n euverstap nao de rockmuziek, mèt behaajd vaan väöl koperwerk evels. Hun ierste nómmer is de choquante Strontj-blues (vergliek de Drieteriejeblues vaan Normaal e paar jaor ieder). De jaore daonao bojde ze in (Zuid-)Limbörg 'n gooj reputatie op en späölde ze op versjèllende locaties, boe-oonder de Vriethof in Mestreech. In 1982 kaom de band op Hilversum 3, in 't program NOEN SJOW, mèt 't leed Sollicitere, e protesleed euver de hoeg werkloesheid in deen tied op de melodie vaan Gimme some lovin' (Spencer Davis Group). Daonao weurt 't op single opgenome en in januari 1983 weurt 't 'nen hit in zoewel Nederland (achste plaots in d'n Top 40) es Vlaondere (15e plaots in de BRT Top 30). Datzelfde jaor stoont de Janse Bagge Bend op Pinkpop. Volges 't verhaol wat de bandleje zelf vertèlle[3] heure ze 'ne shovel, boemèt ze nao 't hoes vaan Pinkpopbaos Jan Smeets rije, um vervolges te rope: "Jan, doe mós ós laote sjpele anges duuje v'r dich diene ganse gevel hie direk oet de koeai weg!" De naom Janse Bagge kump vaan Janssen-Baggen b.v., 'n elektrotechnisch bedrief oet Geleen.[4]

Nao 't bereike vaan landeleke bekindheid späölde ze e jaor laank op versjèllende podia door gans 't land. Daonao zakde de aondach veur de band weer in tot provinciaol proporties. Anno 2009 trejje ze nog altied op; de lèste jaore zien ze vaste gaste es openingsact vaan Pinkpop Classic.

Extern links bewirk

Vootnote bewirk

  1. Twan Linders, Er speelt vanavond in het buurthuis een band. De Nederpophausse van de jaren '80 volgens de muzikanten zelf. Uitgeverij Catharsis, Indhove, 2011: pp. 162-3
  2. Hans op de Coul en Ine Sijben, "Dialectpop, het succes van de ironie" in Leonie Cornips en Barbara Beckers (redd.), Het dorp & de wereld. Over 30 jaar Rowwen Hèze, Uitgeverij Vanthilt, Nimwege, 2015: p. 182
  3. https://web.archive.org/web/20110314065503/http://www.jansebagge.nl/bio.htm
  4. Linders 2011: p. 164
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Janse_Bagge_Bend&oldid=456499"