Carboon (band)

Dit artikel is gesjreve (of begós) in 't Heëlesj. Laes hie wie v'r mit de versjillende saorte Limburgs ómgaon.

Carboon woar 'n gróp oet Nederlangs Limburg die meziek makde in 't Limburgs. 't Hoofthema woar de koele.

Carboon besjtóng oet Ben Erkens, tekssjriever Jan Hendriks, Jean Innemee, Conny Peters en Henk Steijvers. De gróp woar verneump nao 't geologisch tiedperk Carboon, woeë-in de Limburgse sjteenkoal woeëd gevörmp.

Hun bekangste langsjpieëlplaat woar "Witste nog, koempel..." oet 1976. Die plaat woar binne veer moande good. Anger bekangde langsjpieëlplate/cd's zunt ó.a. "D'r letse koempel" oet 1979 en "De Bokkeriejers" oet 1994.

In 2015 ('t joar va de miene) koam de gróp (óp initiatief va Joep Pelt) trük bij-ee vuur 'n serie concerte. Hijbij woeëd de plaats va d'r inmiddels gehieëmelde Jean Innemee uëvergenoame durch zie broar René Innemee. Noa e concert óp 9 januari i g'n sjouwbörg in Zitterd woeëde óp 16, 17 en 18 december óppenüj vuursjtèllinge gegeëve i g'n sjouwbörg in Heële, die allemoal oetverkóch rakde. Óp 31 oktoaber 2015 woeëd de "Carboon Doeës" geprizzenteerd. Dit book besjteet oet 2 cd's ("Witste nog, koempel..." en "D'r letste koempel deet de lamp oet") en 2 dvd's.