Jürgen Habermas

Dit artikel is gesjreve (of begós) in 't Norbiks. Laes hie wie v'r mit de versjillende saorte Limburgs ómgaon.

Jürgen Habermas (Dusseldörp, 18 juni 1929) is 'ne Duutsje filosoof, 'ne polletieke filosoof en socioloog. In de jaore zaestèg waor-e èng van de belangriekste vertegenwoordigers van de Frankfurter Schule. Later oontworp-e 'n model va communicatief handele: d'r ieërleke polletieke en maatsjappelijke ömgaank zow gerich motte zieë op wederzijds begrip. Ideaal bezieë mot communicatie plaatsjvinge in 'n machtsvriej ruimte en gebaseerd zieë óp de rede. Dit saoërt communicatief handele is volges zien theorie van deliberatieve democratie noodzakelijke väörwaarde väör 'n functionerende democratie.

Woeërhèèdscommissies

Habermas' filosofie van de woeërhèèd haat o.m. betekenis gehad väör de woeërhèèdscommissies. 'n Oetsjpraak die woeër wilt zieë mot an driej väörwaardes voldoeë:

ze mot uvverèènsjtèmme mèt de feite,
ze mot passe in os besef va norme en
ze mot waarachtèg zieë.

'n Woeërhèèdcommissie mot dus de feite vassjtèlle, die in 't kader van de internationaal norme va miensjerechte plaatsje en waarachtighèèd en betrokkenhèèd tuëne.

Biesjtèllinge in 2004

In Jürgen Habermas en Joseph Ratzinger: Dialectiek van de secularisering - Over rede en religie makt Habermas in zieng biedrage in 't discours 'n aantal biesjtèllinge van zieng theorie över de groondsjlaeg van d'r democratische rechsjtaot.

Habemas erkènt dat de zuver rede die väöraafgóng an d'r sjtaot en 't rech, gewórteld is in en sjtaerk bepaald wert dör d'r Grieks-christeleke achtergroond.
Habermas erkènt noe voolmondig dat väöl burgers de inspiratie vör hun burgerplichte en solidariteet in d'r praxis vöral oet hun religieus övertuginge haole. 'n Sjtrikt rationeel oonderboewing is vör hun morele en politieke betrókkenheed bliekbaar oonvoldoende.

Habermas wilt ruum plaatsj gaeve an de religie naeve de rede. Waal mót de örsjte zich blieve verantwoorde vör de rechterssjtool van de rede. D'r paus van allewiel is 't groeëtendeels mèt Habermas èns mae kan zich neet veende in 't idee van Habermas dat me óp basis van de rede oeteindelek zów kènne kaome töt 'n saoërt waeltethos. Joseph Ratzinger ziet mieë in 'ne permanaente discours, dus in de methode die dör Habermas is oontwikkeld öm töt woeërheedsvinding te kaome.