Groeatvórstendóm Moskou

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

---

Oetbreijing vanne gróndjómvank van 't groeatvórstendóm van 1390 toet 1525.

't Groeatvórstendóm Moskou(Róssisch: Великое Княжество Московское, Velikoje Knjazjestvo Moskovskoje) waas e laatmiddelieëfs Róssisch vórstendóm mit Moskou es de houfstad. 't Waas de veurgengersstaot van 't vreugmodern tsaardóm Róslandj.

't Vórstendóm óntstóng ónger Daniël I, dae in 1283 Moskou irfdje. Róndj 1320 haw d'r 't vórstendóm Vladimir-Soezdal, wo Moskou nominaal ónger veel, euversjieëmp en oetintjelik ouch opgenómme, worop t'r 't rippebliek Novgorod (1478) en 't vórstendóm Tver (1485) vereuverdje.

Moskou bleef toet 1480 'ne vazal vanne Gouwje Horde. Ivan III versterkdje tiejes zien 43-jäörige regering 't vórstendóm nammieë. Hae vóch taenge de groeate rivaliserendje mach, 't groeatvórstendóm Litouwe, en taenge 1503 haw d'r 't gróndjgebied van Moskou verdrieveljig. Door zienen trouw mitte nich vanne lèste Byzantiense keizer vestigdje d'r Moskou es d'n opvölger van 't Romeins Riek, 't Derdje Roeame. Ivan maakdje aanspraok oppen titel "Hieërser van alle Roes".

Ivan zienen opvölger Vasili III vereuverdje in 1512 de stad Smolensk op Litouwe, wobie de grens van 't vórstendóm de Dnjepr bereikdje. Vasili ziene zoon, Ivan IV woort in 1547 gekruuendj toetten ieësten tsaar van Róslandj. Vanaaf den sprik me denouch euver 't tsaardóm Róslandj.