Giorgos Papandreou

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Giorgos Papandreou.

Giorgos Andreas Papandreou (Grieks: Γιώργος Α. Παπανδρέου) (16 juni 1952, Saint Paul, Minnesota, VS) is 'ne Griekse politicus. Vaan 1999 tot 2004 waor heer minister vaan Boetelandse Zake. Vaan 6 oktober 2009 tot 11 november 2011 waor heer premier vaan Griekeland.

Jäög bewirk

Ziene pa waor Grieks en zien ma waor Amerikaans. Bei wèrkde in Minnesota veur de Universiteit vaan Minnesota. Wie 't mèt de economie vaan Griekeland in 1974 beter ging, ging 't gezin trök nao 't moojerland. In zien studentetied woort heer lid vaan de PASOK (ΠΑΣΟΚ).

Aonpak es premier bewirk

Papandreou woort in 'n slechte tied premier vaan Griekeland, zjus in de Europese crisis. Wat bleek waor tot de veurege Griekse euverheid jaorelaank de financiëel ciefers vervals had. 't Begroetingstekort bleek 14 percent te zien in 2009. Allein de EU kós deveur zörge tot Griekeland neet failliet zouw goon, mèt behölp vaan lieninge. Papandreou heet toen gezörg veur 'ne groetsen aonpak. Heer verhoegde de pensioenleeftied vaan 61 nao 65 en verliegde 't pensioengeld mèt tien percent. 't Gemiddeld ambteneersloen woort mèt 20 percent verminderd, de btw woort verhoeg zjus wie de accijns op alcohol en touwbak. Daoneve is de bestuurleke indeiling vaan 1000 nao 400 gemeintes gegaange. Heidoor verloor Panadreou ummertouw mie aonhengers.

't Kaom oetindelek zoe wied tot Papandreou d'n ierste in viefteg jaor waor dee vreugtijdeg mós aoftrejje, umtot de mierderheid vaan de kamer neet mie achter häöm stoond. Dat waor deils, mer neet gans, te wijde aon 't feit tot heer plotseling e rifferendum heelt boe-in Griekse börgers mochte stömme pro of contra 't akkoord tösse Athene en de Europese Unie (EU) um giroreus te bezuinege in 't staotsbudget in ruil veur Europese steun en de garantie tot Griekeland in de Eurozone kos blieve. De EU-leiers sproke ein veur ein aofkeurend euver dit plotselinge besluut. De toendertied President vaan de Europees Kemissie, Jean-Claude Juncker, waor opvallend kritisch (get wat in deen tied hoegsoongebrukelek waor veur 'ne Kemissie-President nao 'ne leier vaan 'nen EU-lidstaot touw). Heer sprook vaan hoegs oonverantweurdelek en gevierlek gedraag vaan Papandreou.

Loukas Papadimos, 'ne politicus dee oonaofhenkelek is en dus vaan gein partij lid is, naom de baon es premier tijdelek euver totdat me weer 'n democratisch verkezing kin hawwe.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Giorgos_Papandreou&oldid=447593"