Pater

Wikipedia:Babel

li Deze gebroeker haet Limburgs es mojertaal.

nl-4 Deze gebruiker spreekt Nederlands op moedertaalniveau.

de-3 Dieser Benutzer hat sehr gute Deutschkenntnisse.

nds-2 Dizzen broeker hef ne maotige kennis van 't Nedersaksisch.

en-2 This user is able to contribute with an intermediate level of English.

Zeuk op tale van gebroekers

Ich bön Roger Dircks oet Mofert. In Mofert bön ich döks baeter bekindj es Pater. Det is `ne bienaam, dae mien vrunj mich oeats gegaeve höbbe. Ich bön gebaore in `t ziekehoes in Remuunj en opgegreujd in Mofert. Mien ajers höbbe ós altied plat gelieërd en dus spraek ich det ouch: Mofers. Mie moder kump oet Zwame, dus `t kan zeen det d'r hie en dao ouch get Zwaamse invloede in miene kal zeen. Al sinds ich klein waas laes is Limburgse tekste, mit name de vastelaovesgezèt van Mofert: Den Uul van den Grauwert. Langzamerhandj bön ich ouch Moferts gaon sjrieve. Op dit moment sjrief ich in `t dagelikse laeve meistal in `t plat, dus ouch e-maile, sms'e en msn'e.

Op peuterspeelzaal "Oos Speelheukske" - waat doe nag in `t jeughoes ónger de kirk zoot - höb ich veur `t ieës Nederlands lieëre kalle. Netuurlik haw ich via de media al get van dees taal mitgekrege. Op Basissjoeal "De Hovenier" in Mofert höb ich veur `t ieës Ingels gelieërd, mer ouch van dees taal haw ich al `t ein en anger mitgekrege. Nao de basissjoeal bön ich nao de brögkklas Mavo-Havo gegange op Bisschoppelijk College Schöndeln in Remuunj. Dao höb ich dan veur `t ieërs Frans gelieërd. E paar jaor later oppe Havo volgdje `t Pruus. Ouch veur `t Pruus geldj weer det ich det al e bietje sprook en good kós verstaon.

Sins januari 2009 höb ich mit mien vrouw e kindj. Ós kindj wuuert ouch in `t plat opgetroch. Dao höbbe veer hieël bewös veur gekaoze. Gelökkig zitte mien vrouw en ich waat det aan geit op eine lien.

Vastelaovesgezèt

Ich bön sinds 1999 actief bie de redactie van Vastelaovesgezèt "Den Uul van den Grauwert". `n Aantal jaor bön ich ouch betrokke gewaes bie d'n opmaak van dees gezèt. Ich bön `n jaor of veer - vanaaf det ich lid waerdje vanne vastelaovesvereinging - kóntakpersoean van dees commissie gewaes. Det höb ich noe euvergedragen aan Johan van Lambaer oete Baenj (vanne Koets) en Sjors van Frans vanne Biemel. Allebei men waat - veur dae laeftied - oetzunjerlik good 'aad' Mofers kalle. Mit e bietje pien in `t hert höb ich aafsjied genómme van `t geregel róndj dees gezèt. `t Waas inne loup vanne jaoren e bietje mien kiendje gewaore. Meh ja, noe höb ich `n ech kiendje en dan mos se keuzes make. Dan kóns se baeter die jónger men det laote doon.

Mofers Dictee

Vanoet de vastelaovesvereiniging zit ich ouch inne commissie van `t Mofers Dictee.

Mofert.nl

Sinds 2003 bön ich bezig mit `n internet-site, wo-op alle Moferter sites staon: Mofert.nl. Dit is inne laop vanne jaore oetgebreid mit `ne agenda, nuuts en nag mieër. Dees site is ouch gans in `t Moferts gesjreve.