Fortuna '54
Dit artikel is gesjreve (of begós) in 't Gelaens. Laes hie wie v'r mit de versjillende saorte Limburgs ómgaon.
Fortuna '54 is ein veurmalige Nederlands Limburgse voetbalclub, opgerich in 1954 door de bekènde zakeman en aannummer Gied Joosten. De club sjpeelde häör thoeswedsjtrije in 't Mauritssjtadion in Gelaen. In 1968 fuseerde Fortuna mèt Sittardia tot de Fortuna Sittardia Combinatie (FSC, later herneump in Fortuna Sittard).
Succesjaore
bewirkFortuna '54 waas de eësjte betaaldvoetbalclub van Nederlandj. De vereiniging sjpeelde in ’t sezoen 1954-1955 in de NBVB-competitie, dae ouch door Joosten waas opgerich. Biej 't aafbraeke van dees competitie, vanwaege 't samegaon mèt de KNVB, sjtóng Fortuna op de eësjte plaatsj.
Joosten boewde 't team op door versjillende gelouterde sjpelers nao Gelaen te haole. D'r woort in ’t begin besjlaote getraind in ’t Burgemeister Damensjportpark in Gelaen ónger leijing van de doe bekènde Hongaar Joszef Vereb. Es manager woort Huub Adriaans aangesjtèld. In de jaore vieftig woorte de Nederlandjse internationals Frans de Munck, Cor van der Hart, Bram Appel, Bart Carlier, Henk Angenent en Faas Wilkes aangetrokke, en wiejer de Luxemburger Spitz Kohn en de Belsj André Piters. Oet de eige regio kaom de international Jan Notermans, Boeb Jongen en André Ravestein. Trainer waas de Oasterieker Friedrich Donenfeld. Óndanks 't semi-professionele karakter van 't Nederlandjs betaald voetbal in deze periood, waas d'r veur dees sjpelers hoesvesting besjikbaar en woorte ze dèks good beloand. Fortuna waas in de aanvangstied hofleverancier van 't Nederlandjs elftal en hej 't bèste sjpelersmateriaal van alle clubs oet de Eëredivisie. Desóndanks woort noats 't landjskampioensjap bènnegesjleip. In 't sezoen 1956/57 waas Fortuna d'r nog 't kortste biej, ’t eindigde doe op veer puntje achtersjtandj van kampioen Ajax. In de dao-opvolgende sezoene eindigde de club es veerde en derde.
Neergank
bewirkDe raeje veur 't misse van de belangriekste bènnelandjse pries zouw gelaege höbbe in de financiering van de duur ploog. Óm genóg geldj bènne te haole, woorte d'r geregeld midde in de waek lucratieve vrundjsjappelikke wedsjtrieje gesjpeeld taenge boetelandjse clubs. Hiebiej woort door de waek väöl gereis en dat brook 't team op in de competitie, d'r woorte zwou väöl puntje versjpeeld taenge clubs die op de ranglies ein sjtök leëger sjtónge. In 1956/57 en 1963/64 wón Fortuna '54 waal nog de KNVB baeker. Es baekerwinnaer sjpeelde de club in 't sezoen 1964/65 van de Baeker der bekerwinnaars (Europacup 2). Fortuna woort aevel in de eësjte runj oetgesjakeld door 't Italiaanse Torino FC. In de International Football Cup 1965-66 bereikde de club de kwartfinale, dae verlaore woort van FC Lugano.
In de jaore zestig óngerging de club eine trukgank, mede veroarzaak door de awwer waerende sjpelersgroep. Ouch nuuj aangetrokke sjpelers es Piet van Rhijn en de Joegoslaaf Alex Petaković ware de 30 ruum gepasseerd. In 1967 waas d'r al sjprake van ein meugelik samegaon mèt sjtreekgenaot Sittardia, mer de fusie ketsjde aaf. Fortuna wis nuuj financiële middele aan te baore en same mèt ein nuuj besjtuur druimde me euver ein nuuj succesperiood, ouch al ómdat de nuuj aangetrokke veurmalige internationals Piet Giesen en Bert Theunissen nao Gelaen kaome. 't sezoen 1967/68 verleep aevel desastreus en eindigde mèt degradatie. Fortuna fuseerde doe toch nog mèt 't ouch gedegradeerde Sittardia tot FSC. Ómdat 't hoager geëindigde Xerxes/DHC zich truktrok oet 't betaald voetbal, moch FSC toch in de Eëredivisie blieve. Ein jaor later degradeerde de fusieclub toch nog.
Eërelies
bewirkNationaal
bewirkWinnaer KNVB Baeker (2x)
Liesaanveurder aafgebraoke NBVB Competitie
Europa-cup
bewirk| Seizoen | Competitie | Ronde | Club | Score |
|---|---|---|---|---|
| 1964/65 | Europacup II | 1R | AC Torino | 1-3, 2-2 |
| 1965/66 | International Football Cup | Groep | FC Kaiserslautern | 2-0, 1-2 |
| Djurgårdens IF | 3-0, 1-0 | |||
| Grasshopper-Club Zürich | 2-1, 1-0 | |||
| 1/4 | FC Lugano | 1-1, 0-1 |
Sjpelerslies
bewirk| Inhawd: |