Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Collaasj vaan versjèllende monuminte in Florence.

Florence (Italiaans: Firenze; in Vlaondere gemeinelek ouch zoe geneump) is 'n gemeinte in Italië mèt 367.825 inwoeners de 30 september 2021 en 'n oppervlaakde vaan 102,41 km². Ze is de hoofstad vaan de gelieknaomege provincie en vaan de regio Toscane. Zie is de achste stad vaan 't land; de ganse agglomeratie Florence-Prato-Pistoia heet zoe'n oonderhaaf mieljoen inwoeners.

Al in de middeliewe waor de stad e veuraonstoond cultureel en economisch centrum; in de Vreugmodernen Tied woort 't de hoofstad vaan 't Groethertogdóm Toscane oonder de femilie de' Medici, later Habsbörg-Lotharinge. De Medici's waore bekinde kunsmecenasse; zij höbbe de stad groete kunssjatte naogelaote. Vaan 1865 tot 1871 waor Florence de hoofstad vaan Italië. Allewijl is de stad neve kunscentrum ouch vaan naom es universitair centrum.

Florence weurt gezeen es de geboorteplaots vaan de renaissance; um zien groet aontal weerdevol kunssjatte steit zien binnestad sinds 1982 op de UNESCO-Wereldèrfgoodlies. Belaankrieke bouwwerke zien de Dom, de Basiliek vaan 't Heileg Kruus (de Santa Croce), 't Pittipaleis, de Ponte Vecchio (Aw Brögk euver de revier d'n Arno) en de Piazza della Signoria. In de Uffizi-galerij, zelf ouch e monumint, vint me versjèllende bekinde beeldhouwwerke en sjèlderije. Ouch d'n David vaan Michelangelo vint me in dees stad (en wel in de Galleria dell' Academia). Ouch op 't gebeede vaan Renaissancemeziek waor Florence toenaongevend. Zoe kaome hei vaandan versjèllende belaangrieke kompeniste oet die periood, zoewie Francesco Landini (oong. 1325-1397). Wijer is Florence de geboorteplaots vaan d'n opera. 't Florentijns dialek späölde 'n sleutelrol bij 't oontstoon vaan de Italiaanse standaardtaol.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Florence&oldid=453953"