Eilat

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

Eilat of Elat (Hebreeuws: אילת) is 'n stad in 't uterste zuje van Israël. Ze ligk ane Golf van Akaba, ane Roeaj Zieë, mer op drie kilomaeter aafstandj vanne Jordaanse haveplaats Akaba, aan 't oeaste vanne Sinaï en 't zuje vanne Negev. Ouch de Egyptische plaats Taba ligk kortbie Eilat. De stad is ómgaeve door berg en ligk próntj oppe grens vanne kóntinente Afrika en Azië.

Eilat is 'n aaj stad die al inne Biebel wuuert geneump. Zoea zów keuning Salomon dao veur zoea driedoezjendj jaor trögk in Etsion Geber, kortbie Eilat, e deil sjeper biejein höbbe gebrach veur góld te haolen in Ophir. Dit aad Eilat laag dinkelik aevel korterbie Akaba es 't hujig Eilat; archeologische vónjste oet 't neolithicum wiezen op 'n gesjiechte die nag väöl wiejer trögkgeit.

Inne Romeinsen enne Byzantiensen tied waas Eilat 'n wichtige plaats veure verdaejiging van 't zujelik deil van 't riek. Tiejes de middelieëve gólj de stad es 'n wichtige doorreisplaats veur moslims die op baejevaart nao Mekka woren 'nt gaon.

De hujige, modern stad Eilat woort gestif in 1949 en is veural 'nen toeristetrèkke. E good deil van 't jaor is 't dao zunnig. Ouch is óngerwaterduke populair, ómdet 't water hieël klaor is mit 'n gemiddeldje temperatuur van 20 graoje, en 't gebied 'n rieke óngerwaterfauna kèntj. Anger watersporte wie watersjieje, zwummen en surfe waeren ouch väöl gedaon. 't Koraalrif bie Eilat inne Roeaj Zieë is 't naordelikste koraalrif vanne werreld; inne zieë zwummen ouch väöl dolfiene.