Deurze

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Ligking vaan Deurne in Noord-Braobant

Deurne is e versteidelek dörp en 'n gemeinte in de Nederlandse provincie Noord-Braobant, aon de grens mèt Nederlands Limburg, in 't Pieëlland. De gemeinte heet 'n oppervlak vaan 119,02 km² (daovaan 1,02 km² water); op 1 januari 2006 woende hei 31.866 lui. Ander kerne zien Helenaveen, Liessel, Neerkant en Vlierde (Vlierden).

Functies

Deurne ligk tösse Helmond en Venroj in en is daodoor vaan oondergesjik belang es verzörgingscentrum. Op de Pieël ligke versjeie legertrainingskampe. In de jaore negeteg woort 't Brits kamp dao evels opgeheve. Deurne heet 'n statie aon de spoorlijn Eindhove-Venlo.

Dörpsaonziech

Klei kestiel Deurne

't Aajd kestiel vaan de hiere vaan Deurne, klei kestiel geneump, steit eve boete 't dörp en geneet erkinning es rieksmonumint. Dit gelt ouch veur 't dinghoes, 't aajd kloester Zeilberg en de rewien vaan 't Groet Kestiel, in 1944 door de Geallieerde in pojn gesjote. Wijer kint de gemeinte hiel väöl aw boerderije die meistal oonder gemeinteleke erkinning es monumint valle.

In d'n umgeving ligke de hei- en bósgebiede vaan 't Nationaol Park de Groeëte Pieël.

Historie

In en um Deurne zien 'n aontal vonste oet de Roemeinsen tied gedoon. 't Dörp zelf duuk pas op in de later Middeliewe: de dörpskèrk weurt in 1069 vermeld. Later woort Deurne 'n hierlekheid, die tot de Fransen inval in 1795 zouw blieve bestoon.

Tot in de negentiende iew bleef Deurne e klei dörp mèt 'n aontal gehöchter um ziech eweg. Sins deen tied is de kóm sterk gegreujd en zien väöl gehöchter in de bebouwing opgenómme.

In 1926 woort de gemeinte Vlierde aon Deurne touwgevoog.

Externe link

• Officieel website vaan de gemeinte