Oirschot

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Ligking vaan Oirschot in Noord-Braobant

Oirschot (oetspraok Oorschot) is e versteidelek dörp en 'n gemeinte in de Nederlandse provincie Noord-Braobant, in de Nederlandse Kempe, mèt 'n oppervlak vaan 102,14 km² en 'n inwoeneraontal vaan 17.805 per 1 januari 2006. De gemeinte umvat de kerne Oirschot, Spoordonk, Oostelbeers, Middelbeers en Westelbeers; de lèste drei plaotse waore tot 1997 vereineg in de gemeinte Oost-, West- en Middelbeers.

Functies

Allewel tot Oirschot vaanajds 'n landbouwgemeinte is, hoesves 't e paar industrieë, die gebruuk make vaan Oirschot zien ligking aon de A58 en de kortbijheid vaan Eindhove en Tilburg. Dao is meubel-, hekwerke- (Heras) en bouwkete-industrie (De Meeuw). Bij Oirschot ligk ouch de groete Generaal Majoor de Ruyter van Steveninck Kazerne, boe oonder andere de huzare vaan Boreel in gelegerd zien.

Aonziech

Pieterskèrk

Oirschot heet nog 'n orzjineel kèrk in Kempese Gotiek, gewijd aon Sint-Petrus-Ban, die oongewoen groet is veur e dörp wie Oirschot. Veural de stómpe 72 meter hoegen torie vèlt op. Ouch heet Oirschot nog 'n Roemaanse kèrk, allewijl in han vaan de PKN (meh in de volksmoond Mariakèrk geneump). Aon de merret ligk 't veurmaoleg raodhoes oet 1513. In de umgeving gief 't nog e paar sjoen natuurgebiede, boe-oonder de Oirschotse Hei, die evels veural es militair oefenterrein gebruuk weurt.

Historie

De naom Oirschot is vaan Germaansen oorsproonk en beteikent mesjiens "groond boe oerosse graoze". D'n Oirschotse vriethof moot zeker vaanaof de vijfde iew bewoend zien gewees; in deen tied zal 't ierste kèrkske vaan hout gebouwd zien op de plaots vaan de modern Mariakèrk. De ierste sjrifteleke brónne koume evels pas oet de veertiende iew; Oirschot waor toen 'n gemeinte vaan 't hertogdóm Braobant. Ouch Best huurde bij Oirschot, en wel tot 1819, toen 't 'n zelfstendege gemeinte woort. In 1997 woort Beers bij de gemeinte Oirschot geveug.

Gebore in Oirschot

• Cornelis van de Ven, bisjop vaan De Bós
• Carl Romme, politicus (KVP)

Externe link

• Website vaan de gemeinte