De Magiër

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

De Magiër of de Bateleur (Nederlands: de Magiër, Duits: der Magier, Frans: le Bateleur) is de ierste vaan de 22 groete Arcana Tarot-kaarte en is 'r ouch 'n archetype wat dèks veurkump in de analytische psychologie en de kuns. In väöl variante vaan de Tarot kump heer nao De Zot, dee op positie nul steit. Vaanwege zien symbolische beteikenis, los vaan 't door sommege lui beargumenteerde spirituele en woerzègkende karakter vaan de kaart, weurt de kaart binne 't Tarot-speul mèt naome gebruuk es oondersteuning um meditatie vaan 't ganse speul te initiëren.

Volges Amerikaanse 19e iewse psychoanalyticus en mysticus A. E. Waite weurt heer dèks gezien es de beliechaoming vaan "de mins zelf, mèt al zien creatief, sjöppend vermoge". In de levesbesjouwing die de Tarot zou motte symbolisere steit de Magiër aon 't begin van zien reis door 't leve. Heer weurt gezien es de brögk tösse minseleke en boveminseleke werelde en is ‘ne communicator, of ‘n antenne, vaan inziechte dmv gedachtes.

In versjillende spirituele subculture en bezegheje, wie de astrologie, weurt de Magiër gelink aon de aries (ram), de len VS en Israël, de edelstein jaspis en robijn, 't elemint vuur, de kleur liechroed, de harmonische oetwèrking vaan pionierseigesjappe en inspiratie, de disharmonische oetwèrkinge vaan impulsiviteit, manipulatie, agressie en eigezinnegheid en de liechaomsdeile kop, hersene, sjedel, ouge, gelaot en bovekaak.

Marseillaise kaarte

In de Tarot-kaarte vaan Marseille is de Magiër aofgebeeld mèt zien hood. Zien hawwing mot de א (Aleph) symbolisere, de ierste lètter vaan 't Hebreeuws alfabèt, die weurt gezien es de verbinding tösse 't hoege en liege. Volges sommege behuurt dees kaart evels tot de twiede lètter vaan 't alfabet: ב (Beth) en beaomt de ierste lètter tot De Zot. Op de taofel ligke versjèllende veurwerpe boemèt heer get vaan plan liek te zien. Dees veurwerpe zien volges de meiste historici 'n referentie nao 't alchemisme. Tot 't duuster is wat rizzelteerd oet 't avontuur vaan de Magiër weurt gesymboliseerd door 't feit tot de taofel meh drei puu heet.

Rider-Waite-kaarte

In de Rider-Waite-kaarte vaan de Britse kunsteneeres Pamela Colman Smith steit de Magiër veur 'n taofel, boe 'n aontal attribute veur 'm ligke oetgestald. Dees attribute zien de veer illeminte vaan de kleine arcana oet 't Tarot-speul: 't zweerd (wat veur de loch steit, meh ouch veur de gedachte en 't geistelek vermeuge), de bokaol (water en regeneratie en wedergeboorte), 't pentagram (eerde, de vöchbaarheid vaan de materiële wereld) en de staf (vuur, de wil en krach um te sjöppe). Heer hilt 'n touverstok, antenne of zoegenaomde lingham vas, die verwies nao zien goddeleke herkoms en communicatieve functie tösse de minseleke (of materiële) wereld en de boveminseleke (of mentaole) wereld. De roeze en witte lelies symbolisere neet allein vröchbaarheid meh ouch de gezuiverde verlanges um zien mach es godeszoon neet te misbruke. De lemniscaat bove ziene kop symboliseert zien ieweg leve of in eder geval de belofte daovaan. De slang die zien eige start bijt verwies nao Ourobouros, die in de Griekse mythologie veur de cyclus vaan 't leve en 't oonindege steit.

Volges Amerikaanse 19e iewse psychoanalyticus en mysticus A. E. Waite, die same mèt Smith wèrkde aon de Rider-Waide-kaarte symboliseert de Magiër de mins aon 't begin vaan zien reis door 't leve. Heer mot liere bereidwilleg te helpe zoonder beloening trök te verwachte. 't Innegste wat heer trök verwach te kriege is de greui vaan ziechzelf en liere neet bang te zien veur 't innömme vaan 'n eige standpönt wat zien hoegere zelf ervaart es de woerheid. Zien zwoerste lesse zulle dao ligke boe heer mèt ziene kop zien hart mot regere.

Psychoanalyse

Op force vaan psychoanalyticus Carl Jung is de Magiër eine vaan de belaangriekste femiliearchetypes, never de mojer, de vajer, de verleefde, d'n held, de Zot, d'n Duvel, de redder en d'n awwe wieze maan.

Binne de Jungiaanse psychoanalyse steit de Magiër centraol es 't begin vaan de zelf-realisatie die ziech kin oontploeie nao de impulsiviteit vaan de Zot. De Magiër weurt dèks door Jung en binne zien treditie gebruuk um Jungs konsep vaan individuatie, 't oondersjeie vaan illeminte of archetypes um 'n kaart oet te teikene vaan minseleke karaktereigesjappe en keuzes. Door middel vaan de zelfrealisatie en de individuatie weurt me volwasse en professioneel: wijl de Zot reageert op lui, prizzenteert de Magiër veur lui.

Dao kump evels bij tot in de psychoanalyse de Magiër neet allein es archetype weurt geïnterpreteerd veur individuatie, mer ouch veur 't vermoge um de wereld en realiteit de aonsjouwe in 'n groeter beeld. De Magiër weurt daomèt dus neet allein 't symbool veur 't oondersjeie vaan dinger, mer ouch es 't symbool veur 't sammebringe en verbinde vaan dinger.

Jungs "archetype veur mirakels" weurt ouch dèks gelink mèt de Magiër. Heidoor zou de Magiër symbool kinne staon veur de hoop-gever. De Magiër lieket in dat geval ouch mie op zien archetype oetgebeeld in de Marseillaise kaarte, es eine dee lieket op De Zot en neet per se kènnis brink. Zien hoop kin gebaseerd zien op kènnis, mer eve good op 'n truc.

Psychiatris Alan McGlashan interpreteerde de Magiër es 't archetype wat heer 't leefs "d'n Druimer" neumde. McGlashan sjreef in 1967 tot de Magiër of Druimer "continue de sjijnbaar oonmeugeleke dinger veur mekaar krijg" en tijd en ruimte lieke te manipulere, wie lui in 'n druim dat ouch doen.

Verhaole

• Carl Jung linkte 't Biebels verhaol vaan Mozes aon de Magiër, boe-in heer obbenuits zien idee benaodrökde tot de Magiër neet allein symbool steit veur volwasseheid, kènnis en pioniere, mer väöl mie symbool steit veur hoop. In dees zin maak 't dus neet mie oet of Mozes wèrkelek de zie kin sjije zoewie dat weurt beweert in de Biebel. Wat belaangriek is, is tot Mozes es archetype lui heet overtuig tot heer 't kin, en daodoor 'n belaangriek symbool veur hoop is.

Bronne

• Franstaolege Wikipedia
• Oldenburg, E. (1971; 2010). De Tarot als sleutel tot inzicht (pp. 25-27).
• Nichols, S. (2019; 1980). Jung and Tarot. Hoofstök 4.