Nasjonaal Park De Maasdune

Dit artikel is gesjreve in 't Venloos. Ómdat 't plaatsgebónge is, maogs doe 't ómzètte nao 't Baergs, es te dit dialek sjpriks.

't Nasjonaal Park De Maasdune is 'n nasjonaal park in 't naorde van Nederlands Limburg. 't Is ein bós- en heigebeed op 'ne langgerekde zandrök, tösse de Maas en de päöl mit Pruses. 't Park is zoeën 4.500 hektaar groeët, twintig kilomaeter lank, slechs twieë à dreej kilomaeter breid en leet veur 'n groeët deil in de gemeinte Baerge. De dune zien ónderdeil van 'n langer kete van reveerdune tösse Gennep en Venlo. Daomit is ze de langste revierduungordel van Nederland. Ten naorde van Gennep hèlt de dunerie op en is 't land vlaker, beej Venlo gaon ze euver in de Maasterasse. De dune zien tösse de vieftieën en de dertig maeter hoeëg. De hoeëgste is 34 maeter baove N.A.P.

De vörming van de Maasdune

De fysische factore water en wind hebbe 'ne wiechtige rol gespeuld beej de vörming van de Maasdune. 't Netuurgebeed besteit oet fluviatiel aafzettinge en aafzettinge mit melm. In 't Pleistoceen struimde de Rien nog door 't gebeed en waas de Maas 'n ziereveer van de Rien. Det kin me truukzeen aan de grindaafzettinge in d'n baojem. De Maasdune zelf zien zoeën 21.000 jaore truuk gevörmp tiedes de letsten Iestied. In daen tied woort 't leechter melm aafgezet door 'ne krachtige westewind. Allewiel zien sómmige van die gebeje nog altied in "bewaeging", al zien groeëte stökke bebós mit graove den en vuuel ander plekke zien bedek mit hei. In de prehistorie woort 't land al geraojd. In de Romeinsen tied woort dit gedaon veur d'n aanleg van infrastructuur en boew, in de middelieëwe opniej veur raojingsactiviteite en extensief landboew. Vanaaf 't begin van de twintigste ieëw kreeg 't gebeed 'n neteurfunctie. In 1996 woort 't neteurgebeed officieel 'n nasjonaal park, mer nog ónder de naam "De Hamert". Twieë jaore later kreeg 't zienen hujige naam.

Behaer

't Park is in behaer beej 't Limburgs Landschap, Staotsbósbehaer, gemeinte Baerge en Gennep en inkele particuliere eigenaere. Wiechtig ónderdeil van 't beleid is 't nateurlik in stand halde van de hei door 't truukdringe van bós, in 't bezónder rilletief jónge graove denne-aanplant. Daoveur waere geite en gallowayrindere ingezet. Heejdoor óntsteit 'n aafwisselend landschap mit naoldbös, loufbös, hei, venne en melm.

't Nasjonaal park is verbónde mit de Mienwaeg en 't terasselandschap beej Venlo.

De kroeënekraan

De kroeënekraan trek in 't veur- en in 't naojaor euver De Maasdune en striek denaer beej de vuuele venne in 't neteurgebeed, wie De Hamert. Dit is hieël bezónder in Nederland. Daorum is de vogel opgenaome in 't logo van 't nasjonaal park.

Ónderverdeiling

De volgende neteurgebede hure beej 't park.

Bosse Hei
Heukelemse Hei
Eckeltse Baerge
Baergerbós
Landgood Bleijenbaek
Baerger Hei
Bósserhei
Welse Hei
De Hamert

Platse

Offere
- Bleijenbaek
- Gening
- Hengeland
- Lakei
- Rimpelt
Ni-j-Baerge
Wel
De Loj
- Zeelbaerg

Toerisme

Toerisme is 'ne wiechtige brón van inkómste veur de gemeinte Baerge. 't Neteurschoeën trek jaorliks vakensiegengers. Daodoor zien d'r rilletief vuul bungalowparke, hotels en kampeerplatse te vinde. Op 't Leukermaer en 't daomit verbónde Reindersmaer wuurt watersport beoefend. 't Strandbad van 't Leukermaer is regionaal good bekind, wies Numwaege en wies ónder Venlo.

Topografische kaart

Klik op 't kaertje um 't te vergroeëte

Extern linke

Commons: Nationaal Park De Maasduinen – Media gerelateerd aan dit óngerwerp

Brón

Dit artikel is gebaseerd op d'n inhald van 't corresponderende artikel op de Nederlandse zösterpazjena.