De Hoegepreesteres

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

De Hoegepreesteres, de Pausin of de Papesse (Nederlands: De Hogepriesteres, Duits: Die Hohepriesterin of Die Päpstin, Frans: La Papesse, Ingels: The High Priestess) is de twiede Tarotkaart oet de groete Arcana en 'n bekind archetype in de kuns en analytische psychologie. Euver 't algemein weurt de Hoegepreesteres gezien es symbolisch veur de passieve weeg: mentaole activiteit, in plaots vaan fysieke, steit centraol. In de woerzègkerij steit de Hoegepreesteres veur gans en al wat gelink is mèt studere, opleiing en liere. Ze is daomèt gerillateerd aon reflectie, mentaol wèrk en analyse. Ze kin ouch 'n vrouw vertegeweurdege die 'n intellectueel activiteit praktiseert.^[1]

Dèks weurt de Hoegepreesteres es tarotkaart en archetype verboonde mèt de al bezitte mer nog verborge kènnis, de intuïtie, 't umgaon mèt mysterië, vrouwelekheid en 't vrouwelek beginsel, innerlek evewiech, verhoeg zelfbewöszien, tied veur euverdènking, telepathie, geduld, tactvolheid, oontvaankelekheid en waokzaomheid.

In de astrologie weurt zie meistes gelink mèt d'n taurus (stier), mèt de len Ierland, Denemarke en Pole, mèt de edelstein blauw saffier, roezekwarts en lapis lazuli, 't illemint eerde, 't temperamint melancholie, kaajd en druug, de kleur liechblauw, de harmonische oetwèrkinge praktisch en standvasteg, de disharmonische oetwèrkinge dogmatisch en halsstarreg en de liechaomsdeile hals, nek, amandele, sjildklier, keel en stömban.^[2]

Rider-Waite-kaarte

In de kaarte vaan Amerikaans kunsteneeres Pamela Colman Smith en Britse 19e iewse mysticus Dr. A. E. Waite weurt de Hoegepreesteres aofgebeeld op 'n carré-vörmege zetel veur 'n tempel, tösse 'n zwarte pilaar en 'n witte. Op de päöl gief 't lotus- of leliemotieve en vröchbaorheidssymbole. Waite zeet vaan dees kaart tot 't aonwiezinge gief tot de Hoegepriesteres behuurd tot de hoogste en heilegste vaan de groete arcana. Op de päöl staon de lètters B en J. De B steit veur Boaz: "in Häöm is de force"; J steit veur Jachin: "Heer dee groondves". De kaart kin in drei deiler weure gezien, boedoor ze steit veur de drei machte: de linkerzijde is 't duusternis, de rechterzijde 't leech en 't midde de ziel die volges de kunsteneeres ouch verwijs nao sjechinah, de vrouweleke versie vaan God. In de middezuil staon ouch rifferenties nao 't Juuds geluif in de leveboum, wijl de twie pilaore symbool kinne staon veure tegestèllinge: duuster en liech, koed en good, vrouwelek en mannelek. Ouch de granaatappele en de palmbuim vaan de levesboum kinne symbool staon veur 't manneleke en 't vrouweleke. Door de tegestèlling in dees kaart stèlle Smith and Waite tot versjille, einheid en vrundsjap belaangriek aspekte zien vaan de kaart. Oonderaon kin me 't begin vaan de zie zien, die de bron is veur alle aander arcana. De kennis vaan de levesboum steit in 't book vaan de Papesse: tora, wat op 't book steit, beteikent lier. De voot vaan de Hoegepreesteres rös op 'n have maon die wijs op de oontvaankelekheid en de vashawwendheid vaan 't oonderbewöste. 't Kruus op häör boors stèlt 't zjuste gebruuk veur vaan de veer werktuige, de veer illeminte, die op de taofel vaan de Magiër ouch ligke. De kroen die de Hoegepriesteres druug, mèt twie heurens en 'n glanzende sjijf vaan de maon, verwijze nao die vaan de Egyptische maongodin Isis, bekènd es de echgenoet vaan Osiris, keuningin vaan hiemel en eerd. Umtot in sommege gesjrifte zjus weurt gestèld tot Isis de mojer of zöster vaan Osiris waor, stèlle Smith en Waite tot Isis 't alledrei is: häör vrouweleke opdrach is de maan te doen trögkkiere tot 't spiritueel leve.

Volges Smith en Waite wijs de kaart op de behoofte um 't vrouwelek prinsiep te integrere in 'n mannelek georiënteerde sameleving en dees mie evewiech te bringe, mèt es rizzeltaot 't opbouwe vaan wezeleke weerdes, Veer zulle aonzienlek greuie wienie v'r liere zien tot de handelinge vaan aandere us eige oonbewöste bespegele. ^[3]

Marseillaise kaarte

Mie es in de Rider-Waite-kaarte verwijs de Marseillaise versie vaan de Papesse hiel direk nao Jeanne la Papesse, die volges väöl historici de einsegste vrouweleke paus dee Roeme heet gekind waor. Volges die legende raakde de in 't allewijl Duitsland gebore Joan vaan Ingeland (ze zaw Ingelse awwers höbbe gehad) zwanger vaan 'ne preester. Allewel ze häör zwangersjap wis te verhölle en deej es of ze 'ne maan waor, beveel ze tijes de paus persessie op de trappe vaan de Sint Pieter in 't Vatikaon vaan 'ne zoon. De woedende meinegte strote ziech op häör boenao ze hiemelde. Achter häör geif 't 'n geel dook op de kaart. Wat 't achter dat dook gief is duuster. De Papesse symboliseert 't orakel, de bemiddeleerster tösse 't lot en de mins en verlient touwgaank tot de verborge wereld veur hun die häör taol kinne interpretere. In aander oetgaves vaan d'n Tarot vaan Marseille symboliseert zie 'n dubbelfiguur wat ouch veur Juno kin staon: de Roemeinse godin en besjermster vaan de Roemeinse staot. Zie is de dochter vaan Saturnus, vrouw vaan Jupiter en mojer vaan Mars. Dit verwijs nao de dubbelrol vaan de Papesse es keuningin vaan de hiemel en vaan de doeje. Traditioneel steit zie bekind es de besjermkaart vaan 't speul.^[4]

↑ Franstaolege Wikipedia - introductie vaan La Papesse.
↑ Oldenburger, E. De Tarot als sleutel tot inzicht (2010). P. 30
↑ Oldenburger, E. De Tarot als sleutel tot inzicht (2010). Pp. 28-29.
↑ Oldenburger, E. De Tarot als sleutel tot inzicht (2010). P. 29.

[1] Franstaolege Wikipedia - introductie vaan La Papesse.

[2] Oldenburger, E. De Tarot als sleutel tot inzicht (2010). P. 30

[3] Oldenburger, E. De Tarot als sleutel tot inzicht (2010). Pp. 28-29.

[4] Oldenburger, E. De Tarot als sleutel tot inzicht (2010). P. 29.

[1]

[2]

[3]

[4]