André Rieu

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

André Léon Marie Nicolas Rieu (Mestreech, 1 oktober 1949) is 'ne Limburgse violis en dirigent, dee bekind is gewore mèt salonmuziek en leechte klassieke muziek.

André Rieu, telg oet 'n femilie vaan muzikante, begós mèt vijf jaor viool te speule. Veural z'ne vaajer, 'ne dirigent, ancourazjeerde häöm daobij. Vaan 1968 tot 1973 studeerde heer aon 't conservatorium, iers in Luuk, later in Mestreech, woe heer o.a. les kraog vaan Herman Krebbers. Daonao bezoch heer tot 1977 de Brösselse muziekacademie, boe heer de ierste pries in de wach sleipde.

Daonao begós heer 'n carrièr in 't orkesweze, boe heer ziech, door 't Mestreechs Salonorkes op te riechte, al mètein op 't leech rippertwaar riechde. Veural de wals intrigeerden 'm. Ouch trad 'r op es soloviolis bij 't Limburgs Symfonieorkes. In 1987 begós heer mèt zie Salonorkes (wat eigelek mer e klein ensemble waor) 'n ech orkes, 't Johann-Straussorkes.

Nao e paar jaor in relatief rös te höbbe gewerk braok heer in 1993 landelek en zelfs Europees door mèt de Twiede Wals oet de Jazz-suites vaan Dmitri Sjostakovistj, die 'ne top-40-hit woort. Heer toert sinsdeen euver de ganse wereld, mèt groete orkestraal shows en 'n rippertwaar vaan good verteerbaar klassieke muziek, salonmuziek, operette, popmuziek, volksmuziek en soundtracks. Heer wèt daobij väöl publiek te trèkke wat normaol neet nao klassieke muziekoetveuringe kump. Zien shows koste evels zoeväöl geld tot heer vaan tied tot tied in financieel probleme zit. Ouch is zien populistische en commercieel marketing häöm op groete kritiek vaan 't klassiek concèrtpubliek koume te stoon.

Oondanks zien frequinte toernees trejt 'r ouch nog dèks in zien gebuurdestad of örges aanders in Nederlands Limburg op.

Rieu bespeult 'n Stradivarius oet 1667.

Selectief discografie

1989 - Hieringe Biete
1991 - Vrijthof Concert
1994 - Strauß & Co.
1995 - Wiener Melange
1996 - André Rieu in Concert
1997 - Mein Weihnachtstraum
1998 - Romantic Moments
1999 - Fiesta! / Das Jahrtausendfest
2000 - La Vie est Belle
2003 - Romantic Paradise

2004 - The Flying Dutchman
2006 - Christmas Around the World
2008 - Live in Vienna
2010 - My African Dream
2013 - Nuits Magiques
2016 - Magic of the Waltz
2019 - Happy Days
2021 - Happy Together
2023 - Jewels of Romance
2024 - Love Is All Around

Extern linke

Euverzich vaan d'n Vriethof in Mestreech bie un optrejje vaan Rieu mit zien Johann-Straussorkes (2018)