Zieëlieëve

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

De zieëlieëve (Letien: Otariinae) vörmen 'n óngerfemielje van robbe (Pinnepedia); zie behuuere toete oearrobbe (Otariidae). De bieëster kómme veur in gemäötigdje en subpolair kusgebiede bieje Groeaten Oceaan, de Atlantische kus van Argentinië toet Zuud-Breziel, en 't zuje van Australië en Nuuj-Zieëlandj. De zieëlieven splete zich veur zoea 3 miljoen jaor trögk aaf vanne zieëbaere (Arctocephalinae). Zieëlieve zeen gemeinelik grótter es de zieëbaeren en höbben 'n stoemper naas en klènder flippers. 't Wichtigste versjil tösse de twieë ligk bieje óngervach, went zieëlieven höbben 's gèn.

E deil vanne saorten haet mane, wie de manerob. Dinkelik verwies 't deil "lieëf" inne naam nao de mane vanne bieëster. Wen de vach naat is, zeen de manen aevel ónzichbaar; wen de vach druueg is, staon de haoren oeterein en waere de mane waal good zichbaar.

Taxonomie

Riek: Animalia (bieëster)
- Stam: Chordata (chordabieëster)
  - Klas: Mammalia (zougdere)
    - Orde: Carnivora (roufdere)
      - Klaad: Pinnipedia (robbe)
        Femielje: Otariidae (oearrobbe)
        Óngerfemielje: Otariinae (zieëlieëve)

Indeiling

Otariinae wuuert wiejer es volg ingedeildj:

Geslech Otaria
- Manerob (Otaria flavescens)
Geslech Eumetopias
- Stellerzieëlieëf (Eumetopias jubatus)
Geslech Neophoca
- Australische zieëlieëf (Neophoca cinerea)
- † Neophoca palatina
Geslech Phocarctos
- Nuuj-Zieëlandjse zieëlieëf (Phocarctos hookeri)
Geslech Zalophus
- Californische zieëlieëf (Zalophus californianus)
  - Californische zieëlieëf (Zalophus (californianus) californianus)
  - Japanse zieëlieëf (Zalophus (californianus) japonicus)
  - Galápagoszieëlieëf (Zalophus (californianus) wollebaeki)

Of de naordelike zieëbaer (Callorhinus ursinus) bieje zieëbaeren of bieje zieëlieëven huuertj is 'n puntj van discussie.