Strandjwaegbrei
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
Strandjwaegbrei of zieëwaegbrei (Plantago maritima) is 'n vaste plantj die behuuertj toete waegbreifemielje (Plantaginaceae). 't Is 'n plantj die 'n veurkäör haet veur sjorre, kwelders en strandjvlakdjes achtere zieëreep, en wiejer ouch veurkump langs zieëdieke, in ziltje graas- en reetlenj en in waeggrave. Strandjwaegbrei kump van netuur veur in Eurazië en is oetgediedj nao Naord-Amerika.
De plantj wuuertj 15 toet 60 cm hoeag en haet e wrotelrozèt. De toet mieër es 10 cm lang en 2 toet 6 mm brei, vleisjige blajer zeen lienvörmig en höbbe drie toet vief nerve.
Strandjwaegbrei bleutj van mei toet september mit witsige blome, die zeen gerangsjik in 'nen 3 toet 10 cm lange, cilindrischen aor. De echelste kelchsluppe höbben 'ne sjerpe keel. De helmhökskes zeen gael. De steel vannen aor is rolróndj.
De vröch is 'n eivörmige doeasvröch.
De plantj liek väöl op klein plantje vanne hirtshäörewaegbrei (Plantago coronopus), meh versjiltj daovan doordet 't blaad neet ein, meh drie toet vief nerve haet. Jóng blajer kónne juus wie biejen hirtshäörewaegbrei raw of gekaok waere gaete.