Wiengaardsberghaof

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

De Wiengaardsberghaof ies 'n groate carréboerderie, die gelege ies op de Wiengaardsberg bove 't dal van de Watervalderbaek en 't gehuch Waterval. Op de zuudhelling van deze berg, ies ièwelank wien geteeld en ouch nao 2000 ies 't wir 'n wiengood.
De gesjlote haof, gelege aan de Mestreechterweeg, liek einzaam in de velde. Rónd de binneplaats sjtoon drie vleugele opgetrokke in baksjtein. Opvallend zin de trapgevele. De veerde vleugel ies tot 1945 'n neogotisch landhoes of kesjtièl gewaes. Daovan zin allein nog 'n paar keldersj euver.