Körfke

Dit artikel is gesjreve (of begós) in 't Norbiks. Laes hie wie v'r mit de versjillende saorte Limburgs ómgaon.

e Körfke, ooch wal videeke, pasteike of vol-au-vent geneumd, is 'n hartig blajjerdèèggebak dat traditioneel in d'r Euregio Maas-Rien mèt 'ne hoonderragout gevöld wert. 't Is e waerm en hartig väörgerech dat nao de sóp en väör 't hoofdmaol geserveerd wert mèt get sjiefkes citroeën. Ooch wert 't wal gaeëte mèt friete of broeëd es lunch.

D'r oetveender van 't körfke zów d'r fraanse kok Marie-Antoine Carême (Paries 1784-1833) zieë gewes: E zów 'ne paté in plaatsj va mèt patédèèg mèt blajjerdèèg gemakd ha. Wie de käöekehulp d'r paté zoog, zów dae oetgerope ha: „Maître, il vole au vent!“ (Mèèster, e vluugt in de lóch) ömdat oet d'r platte dèèg 'n taoëre-echtige vörm oontsjtande waor.

Mäögelèk kènt me in d'r Euregio 't körfke dus saer d'r Fraanse Tied.

Väörgebakke körfkes kriet me bie d'r bekker of in de supermarkte. Örsj sjniejt me de dèkselkes oet de körfkes en da werre de körfkes en dèkselkes in 10 minute in d'r aoëve aafgebakke. Daonao werre ze gevöld mèt 'ne ragout en hèèt geserveerd.