Verdraog van Èèsjde

Dit artikel is gesjreve (of begós) in 't Èèsjdes. Laes hie wie v'r mit de versjillende saorte Limburgs ómgaon.

---

't Verdraog van Èèsjde, diks 't Verdraog van Maeërsje genumd, zow geteakend zien ien 'n karolingisch good oe noe Kesjtieël Vaeshartelt likt tusse Maeërsje en Mesjtreech, en dateert oet 870. 't Karolingisch Midderiek, dat aon Lotharius I, zoën van de ien 840 gesjtorve Lodewijk de Vrome, waor gevalle, woert mit dit Verdraog verdejld tusse 't West-Frankisch Riek en 't Oêsj-Frankisch Riek.

De aonlejjing waor de doed, ien 869, van de kingdeloze Lotharius II. Zinge nonk (broor van Lotharius I), Karel d'r Kale en Lodewijk de Dujtser, resjpectievelik de keunige van West- en Oost-Francië, verdejlde de naolaotensjap van Lotharius II. Ien Lotharinge woert de grens tusse 't Franse en Dujtse këuninkriek gevurmd doer de laop van de rievere de Maos, de Ourthe en de Moezel. Itaolië en Bourgondië weerde aogesjloeëte bie 't Dujtse Riek.

Èèsjde, plaots van ongderteakening

Oet grongdig ongderzeuk ien de Annales Bertiniani is geblieëke dat 't Verdraog havverweags Maeërsje en Herstal in locoaspide super fliviu, Mosam geteakend zow zien. De grongdvörm van de naom Èèsjde is Aspide. Schrijnemakers bringt de naom Aspide ien verband mit hasp, krómming, häök, buiging (n.l. van de Maos). Allewiel weert d'r neet mie aon getwiefeld dat dit verdraog ien Èèsjde is gesjloeëte, temieë umdat ien 878 doer de zeuns van de betrokkene dit verdraog weert bekrachtigd in Villa Fura gelaege tusse Maer, Norbik en Voere.

Verdraag va Verdun 843 / Èèsde 870

't Verdraog van Maeërsje maog neet verward wurre mit 't Verdraog van Verdun van augusjtus 843. Doe weert 't Karolingisch Riek namelek verdejld ongder de driej zeuns van Lodewijk d'r Vrome. Lotharius I weert, neave de keizerstitel ien Italië, 't Midderiek towgewieëze. Dit waor 'n, doer de vurm van 't land, lesjtig te regere land. 't Besjtóng oet Friesland van Zwin tot Wezer en de sjtroeëk begrensd doer Sjelde, Maos en Rejn. 't Waor uever de ganse lengte min of mier eave bread en leep tot aon de Middellandse Zie.