Tièn Gebode

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

De Tièn Gebode of decaloog (Grieks= 10 weurd), ies 'n benaming veur de veurnaamste 10 reigele of gebode, die toegepas weure bie de christene. Volges 'n verhaol in Exodus 34:28 zint dees gebode door God aan Mozes gedicteerd. Mozes haet die toen ingebeiteld op twiè sjteine taofele. Dao besjtoon 2 versies van de gebode in Ex 20:1-7 en Dt 5:6-21. Allebei bevatte ze de gróndeise van 't godsdeenstig en zedelik leve in Israël.

Bie ónderzeukersj van de biebel besjteit versjil van meining euver de nummering van de gebode. Zoa haet de versie die truukgeit nao Philo van Alexandrië (ca 25 v. Chr.- ca 45 n.Chr.) ein ander volgorde es die van Flavius Josephus (ca 36 - 100). De lètste weurt gevolg door de oasterse en reformatorische kèrke. De katholieke en lutherane volge de indeiling van Augustinus (354-430). Bie häöm weurt 't lètste gebod, "geer zölt neet begere" nog ins gesjpliets. Handele tege de reigelsj van de tièn gebode weurt zónde geneump.

De Tièn Gebode

Iech bin de Hièr eure God.

1 Geer zölt gein aafgode verière, meh allein miech aanbaeje en bovenal leefhöbbe.
2 Geer zölt de naam van de Hièr, eure God, mèt ièrbeed gebruke.
3 Dink d'r um, dat geer d'n daag des Hière heiligt.
4 Ièr eur vader en moder.
5 Geer zölt neet doad make.
6 Geer zölt neet ónkuis zin.
7 Geer zölt neet sjtele.
8 Geer zölt tege eur naoste neet valsj getuge.
9 Geer zölt gein ónkuisheid begere.
10 Geer zölt neet onrechvaardig begere, wat van 'ne ander ies.

In de Katholieke kèrk besjtoon ouch nog de Vief gebode van de kerk, veur 't bepale van 'n christelik leve.