Taering

Dit artikel is gesjreve (of begós) in 't Remunjs. Laes hie wie v'r mit de versjillende saorte Limburgs ómgaon.

Lèt good op 't veurbehawd bie medische informatie.
Gank bie gezóndjheidsklachte nao 'nen hoesdokter.

Taering of tuberculose is 'n gekrenkde die weurt veroorzaak door 'n bacterie, Mycobacterium tuberculosis. Patiënte mit aope taering kinne door te hooste de bacterie verspreie. Bao alle organe kinne door de bacterie waere aangetas, mer de meis-bekènde vorm is lóngtaering. Taering is, desses óntdèk in e vreug stadium, te behanjele mit 'n kómbinasie van mediciene, mer de behanjeling doert lang en kin biewerkinge höbbe. Boetedet is de bacterie veur sómmige mediciene minder geveulig gewaore.

Vaccinatie mit BCG-vaccin besjurmp taenge de ernstige gevolge van 'n besmetting mit de bacterie. Dees vaccinatie is neet opgenómme in 't Nederlandjs Rieksvaccinatieprogramma. Ze weurt allein aangebaoje aan luuj die e verhoog risico loupe op 't kriege van de gekrenkdje, wie aan luuj die dök of lang nao e landj gaon wo taering nag hieël väöl veurkump.

Versjiensele

Taering is veural 'n gekrenkde van de lónge, mer in principe kinne alle organe door de tuberkelbacterie waere aangetas. In 't wèste maak lóngtaering óngeveer 60% van alle gevalle van taering oet. In Aziatische lenjer weurt relatief meer taering in anger organe gevónje, wie lymfekleertaering. De meis-veurkómmende symptome van lóngtaering zeen aanhajend hooste, gewichsverluus, nachzweite, pien in de bórskas en blood ophooste. Aope taering beteikent det in 't sputum nao kleuring ónger de microscoop taeringbacterieje te zeen zeen. Dit is de besmettelikste variant van lóngtaering. Lymfekleertaering uut zich door 'n zwèlling van lymfeklere, wie in de hals. 't Is ouch meugelik det taering zich op meerder plaatse tegeliek uut. De symptome van taering boete de lónge hange aaf van de plaats wo de gekrenkde zich bevindj. Bie werveltaering zal beveurbeildj rögkpien kinne optraeje. Herrevleesóntstaeking (tuberculeuze meningitis) is de meis-laevesbedreigende vorm van taering. Door de zwèlling van lymfeknuip kinne ouch bronchieje waere verdrök, wodoor bronchie-echtasieje kinne ónstaon; dit gebeurt bie taering veural in de rechse middelob (syndroom van Brock).