Twiede Prager Oetvinstering

De Twiede Praoger Oetvinstering (op 't Tsjechisch: Druhá pražská defenestrace) waor ein oetvinstering (ouch wel defenestratie) en ein belaankriek gebäörtenis in Praog op 23 mei 1618, dee gezeen kin weure es de aonleiing vaan d'n Daartegjoarege Krieg. Bie dees gebäörtenis woorte katholieke bestuurslui oet 't raom gesmiete door protestantse adel.

Twiede Praoger Oetvinstering.

Aonleiing

Graof Thurn

Groete deile vaan de boheme waore protestant geweure. Kiezer Rudolf II (regierde vaan 1576 bis 1612) had de protestante de vrijheid vaan religieuze expressie towgesjikt in 1609. In 1617 oonder 't bewind vaan d'n opväölger vaan Rudolf, Matthias (regierde vaan 1612 bis 1619), lete katholieke ambtenere de bouw vaan protestantse kèrke stil legke. De protestanten zaoge dit es ein sjenning vaan 't rech dat Rudolfs ze gegeve had. Wie d'r alvas eine nuie kiezer moot weure oetgezuuk, ouch in 1617, koume de protestante in opstand tege de katholieke Ferdinand II.

Raom boe-oet ze zien gesmiete.

De protestantse graof Thurn waor door Bisjop Klesl, eine belaankriek advisäör vaan de kiezer, mèt eine breef vaan zien pos es kastelein (of rintmeister) benome. De graof zeumeert get protestantse adel en same bestorme ze de Praoger Börch boe de regente zouwe vergadere. D'r zien meh veer regente en häör secretarisse present. Twie regente zegke tot ze d'r niks mèt te make höbbe en ze mote de kamer oet. De twie angere geve touw tot zie de breef höbbe gesjierve. Graof Thurns vervaanger es kastelein, katholiek Jarolslaw Martinitz, is d'r ouch. Me dach ierst tot ze de regente zouwe arrèstere meh alle regente en hun secretarisse woorte 't raom vaan de derde etaasj oetgesmiete.

Alle overlèfde de val vaan umtrint 20 paat. De katholieke ambtenere vaan de kiezer zegke tot ze 't höbbe euverleeft vaanwege de genade vaan de ingeler dee veur de katholieke zaok zeen. De protestante zegke tot ze 't euverleeft höbbe vaanwege de peerdsstroont boe-in ze terech kaome.