Sint-Jans-Molenbeek
Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.
Sint-Jans-Molenbeek (Frans: Molenbeek-Saint-Jean; kort-eweg Molenbeek) ies 'n gemeinte in 't Brussels Hoofsjtaejelik Gewes. De gemeinte haet 'n oppervlak van 5,89 km² en 't aantal inweunersj ies 78.520 (1 januari 2005). Sint-Jans-Molenbeek liek t'n weste van 't centrum van Brussel, woavan 't gesjeije weurt door 't Kanaal Brussel-Charleroi. 't Haet 'n vrie hoag percentage inweunersj van Marokkaanse aafkóms.
Molenbeek waor in de mieddelièwe e landboewdörp. In de 13e ièw kaom diet dörp bie Brussel. De kèrk van Molenbeek woort aafgebroke in 1578. In de 19e ièw woort Sint-Jans-Molenbeek aangesjlote op 't Kanaal Brussel-Charleroi, woadoor 't 'n belangrieke industrieel functie koes kriege. Sint-Jans-Molenbeek kreeg doe de bienaam "Klein Manchester". Wie de industrie ziech in de 20e ièw verplaatsde nao 't noorde van de Brusselse agglomeratie en nao 't Kanaal van Willebroek, góng 't achteroet mèt Sint-Jans-Molenbeek. Allewiel haet de gemeinte veural 'n woonfunctie.
Bie de aansjleeg op Paries van november 2015 waore versjillende luuj oet Sint-Jans-Molenbeek betrokke. De daag nao de aansjleeg woorte dao neet minder as vief luuj gearresteerd. Hie-op besjloot de regering in dees gemeinte intensiever op te trièje es in de res van 't land.[1]
