Sino-Tibetaanse spraoke

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

De Sino-Tibetaanse spraoke zeen 'n femielje mit mieër es 400 spraoke die gekaldj waeren in Oeas-Azië, Zuudoeas-Azië en deiler van Zuud-Azië. De spraokfemielje is de op ein nao grótste femielje qua aantaal spraekers (nao 't Indogermaans). De Sino-Tibetaanse spraoke mitte meiste moderspraokspraekers zeen de Sjinese spraoke (1,2 miljard spraekers), 't Birmees (33 miljoen) en 't Tibetaans (8 miljoen). Väöl Sino-Tibetaanse spraoke waere gekaldj door klein gemeinsjappen in aafgelaenge berggebieden en zeen slech gedocumenteerdj.

Väöl subgroepen op 't lieëger niveau zeen good vasgestèldj, mer op e hoeager niveau is nag väöl óndudelik. Tródsdet de femielje döks wuuertj geprizzenteerdj ofwen die verdeildj is in Sinitisch (Sjinees) en Tibeto-Birmees, is 't nag neet euvertugendj vasgestèldj det de neet-Sjinese spraok daadwirkelik 'n eige monofyletische groep vörme. 'n Minderheid vanne óngerzeukers kalle de ganse Sino-Tibetaanse femielje Tibeto-Birmees, en ouch de naam Trans-Himalayaans is veurgestèldj gewaore.

Indeiling

Hie-ónger volg 'n lies mitte veurnaamste subgroepe van 't Sino-Tibetaans^[1]. Spraoke die 'n apaarte pagina op dees Wikipedia höbbe staon achtere subgroep vermeldj:

Sino-Tibetaans
- Sjinees (Sinitisch: Kantonees/Yue-Chinees)
- Tibeto-Birmees
  - Centraal-Tibeto-Birmees
  - Karenisch
  - Ngwi-Birmees
    - Birmees (Achang)
    - Mru
    - Ngwi
  - Naordoeastelik Tibeto-Birmees
  - Sal
    - Bodo-Garo-Naordelik Naga
    - Dhimalisch
    - Jingpho-Luïsch
    - Kuki-Chin-Naga
  - Wèstelik Tibeto-Birmees
    - Bodisch
    - Himalayaans (Wambule)
  - Neet geclassificeerdj

Brónvermeljing

↑ Ethnologue

[1] Ethnologue

[1]