Rob Graafland
Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.
Jhr. Rob Graafland ies 'ne Limburgse beeldend kunstenaer. Hae ies gebore in Mestreech op 26 november 1875 en op 28 april 1940 gesjtorve in Heerle.
Laevesloup
bewirkDe pap van Graafland, Jonkheer Johan Graafland, waor eigenaer van 'n bank. 't Gezin verhuusde van Mestreech nao Amsterdam woa Rob de "Rieksnormaalsjoal veur Teikenonderwiezersj" en tegeliekertied de Quellinussjoal doorleep. Daonao deeg 'r in 1895 de Rieksacademie veur Beeldende Kunste in Amsterdam, ónder Professor Augustus Allebé en Professor Carel Dake.
Rob trouwde mèt Maria Duquesne. De huwelijksreis ging nao Italië. In 1904 reisde Graafland nao de VS um Amerikaanse kunstenaers te ontmoete. In 1905 kaom 'r truuk nao Mestreech. 't Gezin, mèt dochter en zoon, woonde ièrsj in 'n vriesjtaond hoes, nao eige óntwerp, aan de Sjarnerweeg (Sjaan). Nao denao 'n periode in Belsj gewoond te höbbe, kaom 't gezin in 1911 truuk nao Mestreech en ging in 'n hoes mèt groate tuin wone op Sint Pieter.
Rónd zien 40e, op 't hoagtepunt van zien carrière, kreeg Graafland las van drepressies. Mèt 44 ging 'r mèt pensioan. De familie Graafland verhuusde truuk nao Mestreech. Graafland zou tot 1934 neet miè in sjtaot zin um te sjildere. Hae bleef waal actief es teikenleraar aan de R.K. Hoeshoudsjoal, es lid en veurzieter van de Sjoanheidscommissie in Mestreech en es illustrator van kingerbeuk en tiedsjrifte woamèt 'r in 1908 waor begoes. In 1933 verbleef 'r in Apeldoorn en daonao in Vught in 'n kliniek. Es gevolg van 'n daad van agressie tege ziechzelf verloor hae zien rechteroug. Merkwaardig genoeg verdween de depressie nao 'n paar maond; Graafland waor geneze. Metein kaom ouch weer de drang um te sjildere. De familie verhuusde daonao nao Vught.
Graafland lèkde ziech dan toe op portrètsjildere. In 1938 verhuusde hae nao Den Haag. Hie óntsjteit "De Sjtervende Zjwaan". Väöl van zien deuk sjiene op 3 maart 1945 tiedes 't geallieerde bombardement vernietigd te zin. Begin 1940 kièrde hae wir truuk nao Vught.
Onderwies
bewirkNao zien sjtudie wèrkde Graafland es teikenleraar in Mestreech aan 't Sjtadsteikeninstituut, vanaaf 1898. Behalve sjilderkuns doceerde Rob Graafland ouch muziek en literatuur. Graafland herkènde talent in sommige van zien lièrlinge en rónd de ièwwieseling riechde hae de Zóndagsjildersjoal op um hun lès te geve. Lièrlinge waore: o.a. Edmond Bellefroid, Jean Grégoire, Charles Hollman, Han Jelinger en Henri Jonas. In de winter sjilderde Graafland en zien lièrlinge in 'n atelier in de Augustienerkèrk en in de zomer trokke ze de natuur in um "en plein air" te sjildere. Vanaaf 1911 sjilderde ze in de Italiaanse tuin van Graafland op Sint Pieter. Dit onderwies waor graties.
Sjtiel
bewirkZien sjtiel weurt in 't begin vergeleke mèt Rembrandt van Rijn. Later weurt dat miè romantisch-impressionisme. Thema's zin de sjoanheid van 't leve. Väöl van zien vreuger werk zal hae weggoaje.
Limburgse Kunstkring en waardering
bewirkIn 1910 riechde Graafland same mèt Jan Bakhoven, Guillaume Eberhard, Herman Gouwe, Henri Jonas, J. van der Kooy, Jos Narinx en Vic Reinders de Limburgse Kunstkring op. De 1e tentoansjtèlling vóng plaats in mièrt van dat jaor in de Dominicanerkèrk in Mestreech. In 1912 wón Graafland de Bronze Ièremedaille van de sjtad Amsterdam mèt zien creatie "Lezend Maedsje". In 1916 kreeg 'r van H.M. Koningin Wilhelmina de Gouwe Medaille veur zien werke "Levesvreugde" en "Maedsjes in de zón". In 1917 ging Henri Jonas in Amsterdam aan de Rieksacademie sjtuderen. Rob Graafland houw veur häöm 'n stipendium van de sjtad Mestreech kènne reigele.