Ranomi Kromowidjojo

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Ranomi Kromowidjojo (Sauwerd, gemeinte Winsum, 20 augustus 1990) is 'n Nederlandse zwumster vaan Javaansen aofkóms. Sinds 2005, wie ze deilnaom aon de EK kortebaon, zwump ze bij de seniore. Ze deeg twie kier aon de Olympische Speule mèt, in 2008 en 2012, en haolde bij allebei gouwe medajele. Ze is gespecialiseerd in de vrije slaag en de rögkslag.

Carrièr

Kromowidjojo woort gebore es keend vaan 'ne Surinaams-Javaanse pa en 'n Nederlandse ma. Häör awwer broor brach häör op häör veerde aon 't zwumme, iers bij de plaotseleke zwumclub Ducdalf, meh al gaw in wèdstriedverband bij TriVia in Groninge. Mèt häör tiende zwom ze e Nederlands leeftiedsrecord op de 50 meter vrij. Al in 2005, mèt veertien jaor, debuteerde ze op internationaol wèdstrije in 't EK veur de jäög. Later dat jaor debuteerde ze zelfs op 't EK Kortebaon veur de seniore. Häör debuut op 't EK Langebaon kaom 't jaor dao-op; dao haolde ze 'n zelvere medajel in de 4x100 m vrije slaag. In 2007 traoj ze veur 't iers op e WK op; hei haolde de estafètteplóg broons.

In 2008, 't jaor boe-in Kromowidjojo woort oetgerope tot Nederlands talent vaan 't jaor, wisselde ze vaan club (ze góng nao PSV in Eindhove) en deeg ze mèt aon de Olympische Speule (in Peking). Hei won ze in de 4x100 meter vrije slaag 'n gouwe medajel, same mèt Inge Dekker, Femke Heemskerk en Marleen Veldhuis. Häör ierste individueel gouwe medajele won ze in 2010, bij 't EK en WK Kortebaon. In 2012 deeg ze weer mèt de Olympische Speule mèt (noe in Londe). Hei haolde ze 'n zèlvere medajel mèt de estafètteplóg op de 4x100m vrij en twie individueel gouwe medajele op de 50 en 100 meter vrije slaag.

Persoenleke records

Kortebaon

Aofstand	Tied	Daag	Plaots
50m vrije slaag	23,37	19 december 2010	Dubai
100m vrije slaag	51,44	11 december 2009	Istanboel
200m vrije slaag	1.55,77	18 december 2011	Atlanta
400m vrije slaag	4.06,25	19 december 2008	Amsterdam
50m kapelleslaag	26,13	29 december 2008	Saint-Paul
100m kapelleslaag	58,93	8 november 2009	Bozen
50m rögkslag	27,08	13 december 2008	Rijeka
100m rögkslag	59,90	20 december 2008	Amsterdam

Langebaon

Aofstand	Tied	Datum	Plaots
50m vrije slaag	24,05	4 augustus 2012	Londe
100m vrije slaag	52,75	13 aprèl 2012	Eindhove
200m vrije slaag	1.59,77	22 miert 2008	Eindhove
50m kapelleslaag	25,74	7 aprèl 2011	Eindhove
100m kapelleslaag	59,72	13 juni 2009	Eindhove
50m rögkslaag	28,70	5 december 2008	Eindhove

Bron

Dit artikel is gebaseerd op, en gedeiltelek vertaold oet, 't corresponderend Nederlandstaoleg artikel, en wel in dees versie.