Prins-gemaol
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Prins-gemaol is 'nen adelleken titel dee weurt gegeve aon de manneleke partner vaan 'n regerende voorstin. De maan is daan zelf geine regerende voors.
In vreuger tije waore keuningstitels en aandere voorsteleke titels in beginsel allein erfelek in manneleke lijn. Wienie e voorstehoes in manneleke lijn oetstorf, kós de opvolging wel op 'n vrouw euvergoon. Volgens de wètte vaan toen kós 'n getrouwde vrouw evels gein regerende voorstin zien: zoe gaw es (beveurbeeld) 'n keuningin of troenopvolgster trouwde, kraog häöre maan d'n titel. De vrouw woort daan wel keuningin neve de keuning, meh dat waor gein regeringsfunctie en beteikende niks aanders es 'vrouw vaan de keuning'.
In joonger tije wouw me evels liever de keuningin vaan 't eige voorstehoes aonhawwe in plaots vaan e land oonder e boetelands hoes te plaotse. Dit had te make mèt minder strikte geslachsrolle, meh veural mèt de wuns um 't land oonaofhenkelek te hawwe. Dit gebruuk begós bij de Britse keuningin Victoria: wie die in 1857 trojde woort häöre maan Albèr Prince Consort. Zoonder die maotregel waor heer keuning gewore. Later is deen titel, formeel daan wel informeel, touwgepas bij nog ein Britse voorstin (Philip vaan Edinburgh, maan vana Elizabeth II), drei Nederlandse voorstinne) (Hendrik vaan Mecklenburg-Schwerin, maan vaan Wilhelmina; Bernhard vaan Lippe-Bisterfeld, maan vaan Juliana; Claus vaan Amsberg, maan vaan Beatrix).
De vrouweleken tegenhenger prinses-gemaol besteit neet (of 't zouw de vrouw vaan 'ne regerende prins zien). Zoe'n vrouw hèt gewoen keuningin daan wel keizerin. Me kin spreke vaan keuningin-gemaol etc. um 't versjèl mèt 'n regerende keuningin dudelek te make.