Pompeï

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

---

De rwiens van Pompeï.

Pompeï (Italiaans: Pompei; Letien: Pompeii) is 'n gemèndje innen Italiaanse regio Campanië, veural bekandj veure rwiens vanne antieke Romeinse havestad ane Golf van Napels die juus wie Herculaneum en Stabiae mitte oetbersing vanne Vesuvius begrave woort ónger volkanische stein en asse. Dit gebeurde in 't jaor 79 n.Chr., inne twieëdje hèlf van oktoeaber, tiejes 't bewindj van keizer Titus.

De antieke stad Pompeï woort in zie zevenhóngerdjäörig bestaon achtereinvolgendj bewóndj dore Oske, Samniete, Grieke, Etruskiërs enne Romeine, die eder häör eige späör achterlete. Nao de volkaansoetbersing loog de stad bedèk ónger 'n laog volkanische assen en stein (de lapilli), van zoea zès maeter diek. Dit zörgdje daoveur det Pompeï ein vanne bès-bewaardje rwienstej oete Romeinsen tied bleef. Hiedoor kreeg de stad väöl belangstèlling van historici en archeologe, went zie guuef good inzich van 't laeven in 'n ieëste-ieëfsje Romeinse plaats.

Vanne slachoffers vanne volkaansoetbersing haet me giepsaafgeetsele gemaak, det me kan zeen waat häöre lèste hajing waas wie zie stórve. Allewiel is zoea 60% van Pompeï opgegrave. Nao 1999 haet me nieks mieër opgegraven en is me zich gaon richten op behaad.