Pilvaarn

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

De pilvaarn of pilvare (Pilularia globulifera) is 'n euverblievendje plantj die behuuertj toete pilvaarnefemielje (Marsileaceae) en kump van netuur veur in Europa. In Nederlandj steit de plantj oppe roeaj lies es zeldjzaam en aafnummendj in aantaal. 'n Limbörgse plaats wo de plantj veurkump is 't Reigelsbrook bie Mofert.

Naamgaeving en etymologie

Duutsj: Gewöhnlicher Pillenfarn
Frans: pilulaire, boulette d'eau
Ingels: pillwort
Nederlandjs: pilvaren

De botanische naam Pilularia is aafgelèdj gewaore van 't Letiens pilula "kleine bal", nao de vorm vanne sporocarpe. De saortaandujing globulifera is aafkumstig van 't Letiens globulus "kleine bol" en ferre "dragendj".

Kènmirke

De blajer zeen toet 4 à 15 cm hoeag, draoddón, leechgreun en oetloupendj in e fien puntj. Oppe wintjer sterve dees deils aaf. De plantj vörmp iel matte van ónvröchbaar blajer. Van julie toet september waere de späör gevörmp in 'ne bol- of pilvörmige sporocarp dae ane voot vanne blaadbunjelen óntspringk. De späör zeen gaelgries en later zwertsig.

Laefgebied

De plantj kump veur op plaatse die oppe zomer gans of deils druuegvallen op zandj- en leimgrunj, mit naam in släöt, vinne, aafgravingen en kerrespäör mit water det erm is aan fosfaat en carbonaat. De saort is geveulig veur kónkurrensje en kump veurnamelik veur in saorterm begreujinge.

Taxonomische indeiling

Riek: Plantae (plantje)
- Stam: Embryophyta (landjplantje)
  - Klaad: Tracheophyta (vaatplantje)
    - Klaad: Euphyllophyta (echte blaadplantje)
      - Klaad: Monilophyta (vaarnechtige)
        Klas: Polypodiopsida (leptosporangiaatvaarne of echte vaarne)
        Orde: Salviniales
        Femielje: Marsileaceae (pilvaarnefemielje)
        Geslech: Pilularia (pilvaarne)