Niels Peeters
- Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Amies, es te dit dialek sjpriks.
Niels Peeters (Amie, Mestreech * 1992) is 'ne Nederlands-Limbörgse polletieker en waor de fractieleier vaan 't CDA in Mestreech tot 2022. Dat meint: heer is dus ouch Raodslid in de Gemeinteraod vaan Mestreech. De christendemocraat volgde dees positie op vaan Vivianne Heijnen in 2018, wie Heijnen wèthawwer woort in 't Colleesj. Peeters hèlt ziech in de Gemeinteraod vaan Mestreech veural bezeg mèt veilegheid, financies, ikkenomie en Bestuur en Oondersteuning.
Heiveur waor Peeters lid vaan de Kamersjeetgilde Amie, bestuurslid vaan de Hermenie Sint Walburga Amie, Masterstudent aon Arbeids- en Oondernömmingsrech en Staots- en Bestuursrech op de Universiteit Mestreech. Heer is ouch 'nen bestuursadvisäör veur de Provincie Nederlands-Limbörg en dat sinds 1 juli 2020.
Veurtot Peeters raodslid vaan 't CDA woort in 2016, waor heer raodslid vaan de Partij Veileg Mestreech (PVM). Heer woort op basis vaan die partijlies ouch in de Raod gestump. Dit zörgde veur väöl oonvrei binne de PVM, die zagte de euverstap vaan Peters nao 't CDA te bejaomere: "Fractie en bestuur zien vaan meining tot d'n hier Peeters oonrechmaoteg 'ne raodszedel heet mètgenomme, gezeen deze zedel neet mèt eige force is gewerf en touwbehuurt aon Partij Veileg Mestreech". D'n euverstap kaom kort naotot Gea van Loo, raodslid veur de Seniore Partij Mestreech (SPM), ouch euverstapde nao 't CDA. Heidoor kaom 't CDA te staon op zeve zedele; en 't woort daomèt weer obbenuits de groetste polletieke partij vaan Mestreech.