Nederlandse Taalunie

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

De Nederlandse Taalunie (NTU; Limbörgs: Neerlandse Taolunie) is d'n taolraod en 'n kinnesinstèlling veur de Nederlandse taol. Ze woort opgeriech in 1980 door de euverhede vaan Nederland en Belsj mèt es buut um 'n gemeinsjappeleke polletiek te vörme veur 'ne standaard in de Nederlandse taol in Nederland, Vlaondere en Suriname. Op väöl gebede gief 't allewijl neet allein inspraok veur de Nederlandse, Belzje en Surinaomse partije mer ouch veur de partije vaan Caribisch Nederland. De NTU weurt veur 't groetste gedeilte geleid door de oonderwiesministers vaan de drei bovegeneumde len.

Op force vaan dees unie is 't ouch juridisch klaorder gewore in Belsj tot Vlaoms gein oonaofhaankeleke taol is.

Oetbreiing

Suriname ratificeerde zien deilnaome aon de NTU in 2004, wijl Carabisch Nederland dat doog in 2007. Mèt de oonaofhaankeleksverklaoringe vaan Curaçao en Aruba, woorte die twie achterein lid in 2011 en 2013.

In 2010 leet Zuid-Afrika in 'n intentieverklaoring in Brögke weite tot 't land ouch lid zou wille weure. Indirek woort heibij touwgegeve door de Zuidafrikaonse regiering tot Afrikaons 'n Nederlandse dochtertaol is. De nui regiering leet ziech evels in 2014 bejaomere euver dees beslissing boenao 't land ziech tröktrok oet gesprekke euver meugelek lidmaotssjap.

Grammatica en spelling

Dees taolunie gief oonder aander 't in de Benelux zoe bekènde Groene Boekje (Greun Beukske) oet, boevaan de ierste variant in 1865 versjeen oonder de naom Spelling der Nederlandsche taal. Dit handbook riech ziech op de spelling en grammatica vaan de Nederlandse taol en 't weurt in Belsj, Nederland en Suriname in alle officieel contekste gebruuk es 't handves veur 't sjrieve vaan 't Nederlands. In 2005 goof 't 'n hernuide variant. 't Gief 'n traditie tot de Nederlandse Taalunie eder decennium zoe'e "beukske" oetgief. In 2008 leet dees taolunie evels weite tot 't gein nui herziening zou geve in 2015. Of 't wel 'n nui oetveuring zou geve in 2025 waor toen nog neet bekind.