Mienwaeg

Dit artikel is gesjreve (of begós) in 't Ètsberger. Laes hie wie v'r mit de versjillende saorte Limburgs ómgaon.

De Mienwaeg is e nationaal park inne Nederlandsje provincie Limburg, inne gemeindje Roerdale, mit 'nen ómvank ven zoea 16 veerkantje kilomaeter. 't Is óngerdeil ven 't Pruusj-Nederlandsj Grènspark Maas-Swalm-Nette. De Mienwaeg kènmèrk zich es e terrasselandjsjap, óntstange dórchen invlood vè water en bräökvlakke inne aerj, dórchsneie dórch e tal aan baeke.

Oppe Mienwaeg ligk ouch e klei gehuch. Zuuch hieveur: Mienwaeg.

Gesjiechte

De naam "mienwaeg" haet te make mit "gemèndje". De mienwaeg waar namelik de waeg venne gemeinsjap. Spaeder wè me d'r miene wól aanlègke, góng me de naam associïeëre mit de mienboew, men dit is pure vólksetymologie.

't Gebeed is in 1990 dórche minister aangewezen es e natuurgebeed. 't Waas gemeinsjappelik bezit en in gebroek dórche ómlègkendje dörper. E deil ven 't gebeed waas 'n eike hakhówtbósj. Veure mienboew is t'r 'n groeate aanplantjing ven böim gewaes veur stuthówt. Hiedórch en dórch verdruueging woort de hei en 't aanwaezig hoeagvieën stès mieë verdrónge.

Flora & Fauna

d'r Zeen diverse saorte biotoop aanwaezig: eike-bèrkebósje, brookbósje, druueg en nate hei en vènne en baekdale. Veral in de nate hei kómme biezönjer saorte veur wie rónje zónnedów, kleine zónnedów, beinbraek, wilje gagel en klökskesgentiaan. Qua fauna kómmen in dit gebeed wilj zwiener veur en allerhenj reptieler wie d'n adder, de glejje slank, de zandjaektes en de hazelwórm, men ouch allerhenj saorte kwekkerte en salamanders.

Óntwikkelinger

Lanks de vènne kömp hoeagvieën weir toet óntwikkeling. De naoldjbósje en de oetheimsje boumsaorte waere lanksemerhandj eweggehaoldj te góns ven inheimsje saorte.

Bedreiginger

Uuever de grèns in Pruusjes wuuertj óp groeate sjaol daagmienboew ven broenkaol geplieëg. Veur 't perjèk "Garzweiler II" is 'n óntwateringsvergónning aafgegaove. Dees zal ècher mieër effek höbben es toet noe aan is toegegaove.

Inkel luuj zeen d'n Iezere Rien, de aaj spaorlien ven Antjwèrpe nao 't Ruhrgebeed, es 'n bedreiging, ouchal laag deze d'r al ruum hóngerdj jaor veurdet 't natuurgebeed woort irkèndj. Bèlsj wil deze zaer 1991 neet mieë gebroekdje goderelien nuuj laeven inblaoze. Nederlandj verzaat zich mit ónger angere e beroop óp 't natuurbehaad in Nationaal Park de Mienwaeg, men 't "Permanent Hof van Arbitrage" haet de Bèlsje regering in 't geliek gestèldj.