Noord-Beveland

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Dit artikel geit euver de gemeinte; veur 't eiland, zuug: Naord-Bevelandj.

---

Ligking vaan Noord-Beveland in Zieland

Noord-Beveland is e veurmaoleg eiland en 'n gemeinte in de Nederlandse provincie Zieland, mèt 'n oppervlak vaan 91,97 km² (boevaan 34,81 km² water) en 'n aontal inwoeners vaan 7227 per 1 juni 2005. De gemeinte heet de kèrne Colijnsplaat, Geersdijk, Kamperland, Kats, Kortgene en Wissekerke.

Ligking, landsjap, infrastructuur

Noord-Beveland ligk t'n ooste vaan de Noordzie, ten zuie en weste vaan de Oostersjelde en ten zuie vaan 't Veers Meer, bestoont oet 't Veers Gat ten zuidweste en de Zandkreek ten zuidooste. 't Eiland is in 't Deltaplan mèt Walchere verboonde door de Veersegatdam, mèt Zuid-Beveland door de Zandkreekdam en mèt Sjouwe-Duiveland door de Störmvloodkiering Oostersjelde en de Zielandbrögk. 't Gans eiland ligk eine meter bove N.A.P..

Bekaans gans de groond vaan Noord-Beveland is veur conventionelen akerbouw in gebruuk. Aon 't Veers Meer weurt väöl aon toerisme gedoon. De N255 doorsnijt 't eiland.

Historie

In de Roemeinsen tied waor bij Colijnsplaat 'n handelsplaots, Ganuenta geneump; in de jaore zeveteg vaan de twintegste iew heet me dao votiefstein veur de gaodin Nehalennia gevoonte. Nao de Roemeinsen tied begós 't gebeed oonder te loupe en raakden 't oontvolk. Vaanaof de achste iew vestegde ziech weer lui op de zandplaote, die vaanaof 1014 bediek woorte. Dit perces woort in 1134 voltoejd. In 1100 woort de ierste kèrk gebouwd.

In de res vaan de Middeliewe greujde 't aontal neerzèttinge op 't eiland, tot in 1530 en 1532 twie störmvleuj aon 't gans eiland 'n ind maakde. Pas vaanaof 1598 begós me 't eiland obbenuits in te poldere, te beginne mèt Colijnsplaat en Kats, daonao in 1652 Wissekerke, in 1668 Geersdijk en in 1684 Kamperland.

In 1995 woorte de daan nog twie gemeintes Kortgene en Wissekerke samegevoog tot de gemeinte Noord-Beveland.

Externe link

• Website vaan de gemeinte