Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Mokers, es te dit dialek sjpriks.

't Mokers is 't dialek vaan de 't dörp Mook in de Nederlands-Limbörgse gemeinte Mook en Middelar.

Kinmerke bewirk

't Mokers is e Kleverlands dialek, wat kort door de boch inhèlt tot 't korter bij 't Braobants es bij 't eigelek Limbörgs steit. 't Liekent sterk op Genneps, meh versjèlt dao nog op e paar punte vaan. De plaots is naomelek in 't verleie sterk oonder d'n invlood gekoume vaan 't Nimweegs. Daorum liek 't Mokers väöl op 't Maldes en Groesbeeks.

Algemein Kleverlands en algemein Limburgs
  • De Nederlandse ij klink gemeinelek es ie.
Algemein Kleverlandse kinmerke
  • De Nederlandse ui is miestal uu (zuug ouch oonder).
  • Wie bekans alle Kleverlandse dialekte heet 't Mokers brocht en docht ipv brach(t) en dach(t).
  • Sleip- en stoettoene, wie in de Limbörgse dialekte, bestoon neet.
  • 't Woord doe/dich kump neet veur, in plaots daovaan zeet me gi'j.
Euvereinkomste mèt 't Genneps
  • Wie in Gennep kint me in Mook huus en muus, tegeneuver huus en moes in 't Venrods en hoes en moes in de mieste (echte) Limbörgse dialekte.
  • De z klink dèks wie 'n s, al kump dat in Gennep dèkser veur es in Mook.
  • De sjerplang ee en oo klinke gewoen wie ee en oo, zoewie in heer en schoon. In Venroj is dat nog hieër en schoeën.
  • 't Mokers kint, wie 't Genneps, 't dóbbel gij in vraoge: kómde gi'j (wie in 't Braobants, meh aanders es beveurbeeld Venrods kómt gi'j).
Versjèlle mèt 't Genneps, en euvereinkómste mèt 't Nimweegs (typisch noordeleke kinmerke)
  • Veur friet weurt hei ouch patat gezag; Mook en zien naoberdörper zien daomèt uniek in Limbörg.[1]
  • In Gennep en de res vaan de Maosduinstreek zègke ze draad. In Mook is dat draod, wie in bekans gans Limbörg.
  • In Mook höbbe minder wäörd umlaut in de miervoudsvörm. 't Miervoud van draod is nog wel dräöd, meh voet heet voete (in Gennep is dat nog vuut).
Versjèlle mèt 't Nimweegs, euvereinkómste mèt 't Genneps (typisch zuieleke kinmerke)
  • Aanders es in Nimwege en umgeving (oud) weurt in Mook ald gezag;
  • Wie in de mieste Limbörgse en Kleverlandse dialekte zeet me in 't Mokers zoer, wat in Nimwege en umgeving zuur is
  • 't Mokers heet 'n bilabiaol w (mèt de bei luppe gemaak), dewijl 't Nimweegs 'n labiodentaol w heet (mèt de tan op de luppe).
  • 't Mokers kint gillie kómt, en neet gillie kómme (gein einheidsmiervoud op -e).

Cultivatie bewirk

't Gebruuk vaan 't Mokers es sjrieftaol blijf beperk tot de vastelaovend.

Vootnote bewirk

  1. Stroop 1972
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Mokers&oldid=408085"