Miles Davis
Dit artikel is gesjreve (of begós) in 't Remunjs. Laes hie wie v'r mit de versjillende saorte Limburgs ómgaon.
.jpg)
Miles Dewey Davis III (Alton (Illinois), 26 mei 1926 - Santa Monica (Californië), 28 september 1991) waar 'nen Amerikaanse jazzkómpenis, trómpettis en multi-instrumentalis. Hae weurt besjoewd es eine van de belangriekste en invloodriekste jazzmuzikante van de twintjigsten eeuw.
Davis sjpeelde naeve ónger angere Louis Armstrong, Duke Ellington en John Coltrane 'n grote rol in de gesjiedenis van de jazz. Hae sjpeelde versjillende sjtiele, worónger bop, cooljazz, modale jazz en jazzrockfusion. Davis waar 'ne centrale feguur in de óntwikkeling van de drie letsgeneumde sjtiele. Es e gevolg daovan wuert hae ouch waal de Picasso of jazz geneump.
De sjtiel van Davis is herkinbaar en origineel en oefent decennia nao zien hemele nog invlood oet op jazzmuzikante. Op e deil van zien opname gebroekde Davis 'ne harmon mute, e type demper womit hae 't typisch timbre maakde det tiejes de res van zien karrejaer drek mit dem geassocieerd bleef. Ouch ziene klank en sjpeelsjtiel zónger de mute zeen herkinbaar, ónger angere door de typische aafbuginge ane begin of 't inj van de tone en d'n ingehaje lyrische sjpeelsjtiel mit lang sjtildes tösse de melodische frase.