Met het mes op tafel

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

Met het mes op tafel is e tilleviespergram det in Nederlandj wuuertj geprizzenteerdj door Joost Prinsen en wuuertj oetgezónje door Omroep MAX. De ieëste oetzenjig vónj plaats op 2 mei 1997. Doe waas 't pergram nag vanne ómroop NPS. Vanwaenge de fusie van NPS toet NTR waas gein ruumdje mieë veur dit pergram. Vanaaf goonsdig 6 oktoeaber 2010 wuuertj 't pergram oetgezónje door Omroep MAX. In 2005 zónj Canvas ouch 'n Belzje versie oet, geprizzenteerdj door Jo Van Damme.

't Pergram is 'n kómbinaasje van poker (inzètten en bluffe) en 'n kènnisquiz.

Speelregele

De speelregele zeen verzónne door Jan Kok en Joost Prinsen. 't Guuef zeve speelrunj: veer runj die door drie deilnummers waere gespeeldj en twieë sloetrunj en 'n finaal die door twieë deilnummers waere gespeeldj. d'n Deilnummer dae nao de veerdje runj 't minste geldj haet, mót de speeltaofel verlaoten en ane bar gaon zitte (bie Mylou Frencken.

Eder runj besteitj oet 't verplich inzètte van e deil van 't doren ómroop oetgereikdje kóntant geldj, 750 euro de deilnummer, 't sjriftelik beantjwaorde van vraoge gestèldj door Prinsen, inzètten of passe, 't gaeve vanne antjwäörd door Prinsen, oppernuuj inzètten of passen en 't neume van 't aantaal gooj antjwäörd dore speler dae oppe ieëste handj zit, wobie de euverige deilnummers nag èns moge verhuuege. Speelfoute zeen toegestange, behauven es 't geitj óm 'n spèllingsvraog of de spèlling 'n ónjuuste interpretatie kan veroearzake.

In 't geval van mieëder deilnummers mit eizelvendje aantaal juuste antjwäörd, wuuertj middels 'ne zoeageneumdje shoot-out beslaote welchen deilnummer de runj wintj. d'n Deilnummer dae es ieësten oppe knoep drök, maag antjwaord gaeven oppe vraog. Bie e juus antjwaord is hae de winner; bie e fout antjwaord geitj d'n inzat nao d'n angeren deilnummer.

Inne finaal mót d'n deilnummer mit 't minste geldj al zie geldj inzètte. d'n Angeren deilnummer zèt 'tzelvendj bedraag in en krieg ouch 't rech veur, nao 't beantjwaorde vanne vraoge, ein vanne veer vraoge te laote vervange door 'n vraog oet dezelvendje categorie. d'n Deilnummer dae aan 't ènj vanne finaal de meiste vraoge good haet, krieg 't geldj oete pot en 't geldj det eventueel is euvergebleve van zien veurige runj.

Categorieje

Veur 't stèlle vanne vraog wuuertj aangegaoven in welche categorie de vraog vèltj. Dit kan zeen:

Geografie, Ambachte, Biljendje kóns, Börgerie en bestuur, Citaote, Film, Geluif en biegeluif, Gesjiechte, Wie waas 't ouch weer?, Laevendje netuur, Litteratuur, Meziek, Raekenen en spraok, Sjoeane sjien, Sport, Tillevies, en Weitesjap en techniek. In 2007 is de categorie Straotname toegeveug, in 2012 woorte veuren ieëste kieër vraoge gestèldj inne categorie "euvere grens", mit vraogen euver boetelandjse oetdrökking. Toet sloet is nag de categorie "grabbelton", wobie 't geitj euver 'n vraog die neet in ein vanne anger categorieje vèltj.

Mitwirkers

"Croupier": Joost Prinsen
Pianis: Martin van Dijk
Barvrouw: Mylou Frencken
Floormanager: Fred Greven (duuk sómtieds op veur veurwirpe te tuuene)
Redactie: Jan Kok, Thomas van der Steen, Bart Prinsen
Regie: Merel de Geus