Maria Gommers
- Dit artikel is gesjreve in 't Gelaens. Ómdat 't plaatsgebónge is, maogs doe 't ómzètte nao 't Steins, es te dit dialek sjpriks.
Maria Francisca Philomena (Mia) Hoogakker-Gommers (Sjtein, 26 september 1939) is 'n veurmalige Nederlandse atlete, die in de jaore zestig tot de waereldtop op de middelange aafsjtande beheuërde.
Maria Gommers moosj 't neet zoazeër höbbe van häöre natuurlike aanlègk. Zie bereikde de top veural door óntzèttend hèl te traine. In 1967, op 27-jaorige laeftied, waas ze entelik zoawied dat zie zich koosj maete mèt de nasjenale top. Dat wilt zègke: op de 800 m, want 'ne angere middelange aafsjtand lepe de vrouwluuj doe nog neet. Pas in 1967 woort de 1500 m veur 't eësj op 't wedsjtriedprogramma veur vrouwe opgenómme. Maria Gommers greep de kans mèt allebei de hènj aan. Bènne 'n hauf jaor verbaeterde zie 't nasjenaal record op dit nuuj nummer van 4.42,2 via 4.35,6 en 4.22,3 tot 4.15,6. Dae lètste tied waas teves een nuuj waereldrecord, gevestigd op häör toesbaan in Zitterd. Me kènt waal zègke dat Maria Gommers de 1500 m veur vrouwe internasjenaal op de kaart haet gezat.
In 1968 behaolde zie aevel häör meis bekènde prestatie. Tiedes de Olympische Sjpele in Mexico wón zie 'n bronze medalje op de 800 m in 'ne tied van 2.02,6, ein perseuënlik record. Dao-aan veuraafgaond hèj zie op 20 augustus in Zitterd en passant ouch nog in 6.15,6 een nuuj waereldrecord geloupe op de incourante 3 x 800 m vrouwe-estafette, tezame mèt Ilja Keizer-Laman en Tilly van der Made.
't Volgende jaor woort Maria Gommers in 4.11,9 tweëde op de 1500 m tiedes de Europese kampioensjappe in Athene. Zie bleef daomit opnuuj bènne 't besjtaonde waereldrecord, dat intösje waas aangesjerp tot 4.12,4. De Tsjecho-Sjlowaakse Zaroslawa Jehlikova behaolde ’t goud in 4.10,7 in 'n nuuj waereldrecord. Maria Gommers koosj zich aevel treuëste mèt de gedachte, dat zie ènnige maonje eërder biej 'n anger gelegeheid in Leicester 't waereldrecord op de klassieke mijl hèj verbaeterd tot 4.36,8.
In 1969 woort Maria Gommers in Nederland gekaoze tot Sjportvrouw van 't jaor, de ènnige Nederlands Limburgse vrouw die dit pès noe lökde.
Maria Gommers waas van beroep fysisch-chemisch research-assistente biej DSM. In 1970 trouwde ze en beëindigde zie häör atletiekloupbaan, wo-in zie in totaal ach individuele nasjenale titels behaolde, ach nasjenale records vestigde en tweë individuele waereldrecords leep.
Nederlandse kampioensjappe
bewirkOutdoor
| Óngerdeil | jaor |
|---|---|
| 800 m | 1967, 1969 |
| 1500 m | 1967, 1969 |
| veldloupe (lange aafsjtand) | 1968, 1969 |
Indoor
| Óngerdeil | jaor |
|---|---|
| 800 m | 1968, 1969 |
Perseuënlike records
bewirk| aafsjtand | tied | plaatsj | datum |
|---|---|---|---|
| 100 m | 12,6 | ||
| 200 m | 25,9 | ||
| 400 m | 55,6 | Rotterdam | 15 september 1968 |
| 800 m | 2.02,6 | Mexico-sjtad | 19 octwoaber 1968 |
| 1500 m | 4.11,9 (ex-NR) | Athene | 20 september 1969 |
| 1 Eng. Mijl | 4.36,8 (ex-WR) | Leicester | 14 juni 1969 |
Palmares
bewirk800 m
bewirk- 1968: brons OS - 2.02,6 s
1500 m
bewirk- 1969: zilver EK - 4.11,9 s
Ondersjeijinge
bewirk- Nederlands sjportvrouw van 't jaor - 1969
- KNAU atlete van 't jaor - 1967, 1968
Brónne
bewirk- Redactie AW (1968) Nederlandse deelnemers Olympische Spelen De Atletiekwereld nr. 19: KNAU
- Tissot van Patot, ir. P.C. (1969) De weg naar prestaties. De Atletiekwereld nr. 6: KNAU
- Kusmic, B. (1970) Maria Gommers was een echte laatbloeier. De Atletiekwereld nr. 1: KNAU
- Werkgroep Statistiek KNAU (1994) Atletiekstatistiek Aller Tijden KNAU