Leni & Ludwig

Dit artikel is gesjreve in 't Mofers. Ómdat 't plaatsgebónge is, maogs doe 't ómzètte nao 't Nuienhaags, es te dit dialek sjpriks.

Leni & Ludwig waas e Nederlandjs Limbörgs zankduo, det besting oet 't echpaar Leni Raats (Nuienhage, 29 jannewarie 1925 - Landjgraaf 9 april 2013) en Ludwig Rutar (Kirkraoj 20 juli 1915 - 1993). Ludwig zóng en speeldje de steiersen trèkzak, dewiel Leni zóng en 't drumstèl beheef. De grótste hits van 't duo wore Schön ist die Jugend en Rosen der Liebe. d'n Ieëste sting èllef maondj inne hitperaad en bereikdje d'n toep tieën; daomit waas t'r eine vanne grótste hits van 't jaor 1958. Bei nómmers dieëje mieër es ei miljoen exemplare verkoupe.

Ludwig Rutar koom oet e gezin van ach kinjer. Es e kindj lieërdje d'r zichzelf de gitaar enne móndjharp te bespele. Eimaol vólwasse woort t'r aanvenkelik kapper, mer in 1946 woort t'r 'ne professionele muzikantj; hae woort gitaris bie Die Lustige Drei, worin ouch Frits Repin zoot. Kórt daonao lieërdje d'r Leni Raats kènne. Ouch zie waas aanvenkelik 'n kapster, meh zie lieërdje zich 't drumstèl te behouwe. Leni en Ludwig vörmdje zoea e muzikal duo en troedje nag in detzelvendje jaor.

Es duo nome Leni en Ludwig e groeat aantaal aan singles en albums op. De vaste perducer waas Johnny Hoes. Ane begin vanne jaore sèstig woort Ludwig krank, wodoor 't duo nimmieë kós optraeje. Ludwig góng haer in 1993 ane Krenkdje van Parkinson; Leni góng haer in 2013.