Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


Lech Wałęsa.

Lech Wałęsa (oetspraok: Lèch Vawèngsa, IPA: [ˈlɛx vaˈwɛ̃ŋsa]) (Popowo, Kujavië-Pommere, 29 september 1943) is 'ne Poolse politicus, aaje-vakbóndjsleider en ex-president. Hae richde in 't communistische Pole d'n ónaafhenkelike vakbóndj Solidarność (solidariteit) óp en hae wös mit de premier Jagielski óp 31 augustus 1980 'n historisch akkoord te sloete. Veur 't ieës woort in 'n Oeasbloklandj 'n ónaafhenkelik vakverbóndj erkindj dore regering. Solidarność kreeg zelfs beperkde toegank toete radio enne televies.

In december 1981 reep de nuje premier, generaal Jaruzelski, de staat van belègk oet. Veuraanstaandje leiders van COR en Solidariteit, ónger waem Wałęsa, woorte gearresteerdj. Toet 12 november 1982 zoot Lech Wałęsa gevange. Wie d'r vriekoom waar zie vakverbóndj al verbaojen en ouch nao de óphöffing van 't oorlogsrech in juli 1983 woort t'r euveral gevolg dore geheime politie.

Wałęsa kreeg veur ziene vreedzamen inzat veure Poolse wèrkers in 1983 de Nobelpries vanne Vrede. Zien vroew reisde nao Stockholm ómme pries in óntvangs te nömme. In 1989 óntvóng d'r d'n Europese Mienserechtepries vanne Raod van Europa.

In 1990 woort Wałęsa bie de ieëste drekke presidentsverkezinge zaer de ómkieëring gekaoze toet president van Pole.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Lech_Wałęsa&oldid=460868"