Krabechtige

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

---

De krab- of krieëfechtige (Letien: Crustacea) vörmen 'n óngerstam vanne gelidpuuetige bieëster. De krabechtige waeren ówwels de sjaoldere geneump, meh dees term kan mit mekkelik verwarre mitte sjelpdere, die toete weikdere behuueren en neet toete gelidpuuetige.

Taxonomie

Morten Thrane Brünnich richdje de óngerstam in 1772 op.

• Riek: Animalia (dere)
  • Óngerriek: Eumetazoa (orgaandere)
    • Klaad: Protostomia (oermunjige)
      • Superstam: Ecdysozoa (hujingsbieëster)
        • Stam: Arthropoda (gelidpuuetige)

De krabechtige vörmen 'n hieël divers groep aan dere die in gruuedje sterk kónne variëre. Sómmige saorte höbbe mer 'n totaal lieflingdje van inkel millimaeters, dewiel bie anger de spanwiedje vanne sjieëre drie maeter kan bereike. Krieëften en krabbe behuuere toete grótste dere van dees óngerstam; de meiste saorte zeen väöl kleinder. Lang neet alle krabechtige höbbe sjieëren enne meiste krabechtige waere t'n ónrechte "krieëf" geneump, wie de langoes. Ouch waere kleinder saorte echte krieëfte juus es "gernaal" aangemirk, dewiel allein saorte oete infraorde Caridea gernale zeen.

Indeiling

Zès klasse van krabechtige waere óngersjèdj:

• Branchipoda (ónger anger watervluue);
• Remipedia;
• Cephalocarida;
• Maxillopoda (ónger anger aenjmoesjele, einougkrieëfte en karperluus);
• Ostracoda (moesjelkrieëfte);
• Malacostraca (ónger anger krieëfte, krabbe, gernale en zieëkomma's).