Kónsaer

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

Dit artikel geit euvere aopenbaar oetveuring; veure meziekvorm, zuuch: concert.

E kónsaer is 'n oetveuring van meziek veur e publiek. Gebroekelik traeje muzikantjen en zengers op (samen ouch waal "artieste" geneump) in e zoea-geneump "liveoptraeje". In sommige vel gebroek me noe ouch veuringespeeldj matterjaal, de "backtrack". Kónsaers kómme veur in allerhenj aan tuup samenhank en lokaasjes, ouch boete. 't Waord wuuertj zowaal bieje klassieke meziek es inne popmeziek gebroek. Ouch optraejes van fómfaars en hermenieje waere kónsaer geneump.

Kónsaers versjille zich in 't algemeint van broeksmeziek (Gebrauchsmusik), wie dans en fieësmeziek, en ouch van meziektheater, namelik door 't feit det de meziek zelf centraal steit veure loesterieër.

Kónsaers sloete gebroekelik aaf mit 'ne vorm van bedanke, wobie de muzikantje opstaon (es die zittendj höbbe gespeeldj) en zich buge veur 't publiek. 't Publiek bedank den de muzikantje door te klappen inne henj (alle saorte kónsaers), door te sjrieëve (rock- en popkónsaers) of door te vraoge veur 'ne zugabe (ouch waal bies of encore geneump). Döks spele de muzikantje hienao nag ein extra nómmer, sómtieds zelfs mieëdere extra nómmers.

De akoestische verhajinge zeen hieël wichtig bie e kónsaer. Echo en naoklank (galm) beïnvleuje allebei 't klankbild en 't vermeuge vanne muzikantjen einanger te huueren en ouch wiedet zie te huuere zeen in 't publiek. 'n Ruumdje mit 'n slechte akoestiek kan 't optraeje lestig toet zelfs ónmeugelik make. 'n Ruumdje mit 'ne zwake naoklank kan 't geluid dor en ónaangenaam make, dewiel 'n ruumdje mit 'ne lange naoklank de toeane lestig te óngersjeie kan maken en det kan interferensjeperbleme veroearzake. Kónsaers inne aope lóch kónne nag lestiger zeen, ómdet 't gein toe ruumdje guuef die de naoklank kan make. Döks gebroek me dan 'n plaats mit 'n netuurlike akoestiek, wie 'n mert, 'n anger plein, bie 'n moer of 'n aafbegrensdje ruumdje, wie bie 'n amfitheater.

'n PA-installaasje wuuertj gebroek veur 't gehieël (zank en instrumènte) oet te versterken en is nuuedzakelik veur grótter kónsaerzale, lektrikinstrumènten of kónsaers inne boetelóch. 'n PA-installaasje besteit oet 'n groeat aantaal aan óngerdeil, mer innen einveljigste vorm besteit die oet 'n signaalbrón (wie 'ne microfoon) en 'ne geluidsboks mit 'ne vorm van biebehuuerendje versterker (det kan beveurbeildj zeen: 'nen aktieve geluidsboks mit 'n passief mingtaofel of 'ne passieve geluidsboks mit 'n aktief mingtaofel).