Kim Geybels

Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Leumes, es te dit dialek sjpriks.

Kim Geybels (Herk, 29 oktober 1981) is 'n Belsj-Limbörgse urgentiedokter en geweze politica die in Leume woent. Ze zaot korten tied veur de N-VA in de Senaot.

Leve

Geybels studeerde biomedische wetensjappe aon de Universiteit Hasselt, boe ze ouch häör kandidaots dokter deeg. In 2007 studeerde ze aof es dokter aon de Universiteit vaan Leuve en waor sindsdeen actief es urgentiedokter in 't Mariahospitaol in Pelt.

Politieke carrièr

Häör ierste politieke kandidaotsjap had ze in 2006, veur de gemeinteraodsverkezinge in Leume. Dao woort ze evels neet gekoze. Ouch bij de Vlaamse verkezinge vaan 2009 kaom ze neet in 't parlemint. Bij de moonstereuverwinning vaan de N-VA bij de verkezinge vaan 13 juni 2010 evels kaom ze mèt 42.618 veurkeurstumme in de Senaot. Vaanaof dat memint woort ze algemein bekind in Vlaandere, geleef ouch um häör sjoenheid en intelligentie. Ouch kraog ze in juli dat jaor 't veurzittersjap vaan Joonk N-VA in han.

Häör carrièr veranderde evels dramatisch wie ind augustus verhaole oetleekde euver häör arrestatie in Thailand um drugsgebruuk. Verhaole die ze deeg euver e complot voonte gei geluif en ze deeg, nao eige zègke oonder groete drök vaan de partijtop, op 31 augustus aofstand vaan häöre Senaotszedeleer. Piet De Bruyn volgde häör op. Wie ze daonao in de media sjendaol góng make euver häör oontslaag, besloot de partij häör oetindelek op 9 oktober te royere.

Nao häör oetzètting naom ze zitting in de lokaol partij Lumineus Lummen, meh in mei 2012 kundegde ze aon veur mèt de gemeinteraodsverkezinge vaan 14 oktober dao neet op de lies te stoon. Daomèt kaom häör politiek carrièr tot 'n ind.^[1]

Um 't gedwonge ind aon häör loupbaon in de federaol politiek stapde ze nao 't Europees Hof vaan de Reche vaan de Mins. In mei 2019 besloot dat deils in häör veurdeil: ze kraog 5.000 euro sjaojvergeujing en 'n klein 30.000 euro oonkostevergeujing. De gevraogde 381.000 euro aon misgeloupe kezjem es senatries woort häör evels neet touwgekind.^[2]

Bron

Dit artikel is (vrij) vertaold oet 't Nederlands, en wel vaan dees versie vaan 't corresponderend Wikipedia-artikel.

Rifferenties

[1] Het Belang van Limburg - Kim Geybels zet punt achter politieke carrière

[2] De Standaard - Kim Geybels (ex-N-VA) krijgt morele schadevergoeding na ontslag

[1]

[2]