Keyenberg

Dit artikel is gesjreve (of begós) in 't Heëlesj. Laes hie wie v'r mit de versjillende saorte Limburgs ómgaon.

Keyeberg (Duutsj: Keyenberg) is e dörp i g'n Duutsje gemingde Erkelens i g'ne deelsjtaat Noordrien-Wesfale. 't Ligk kótbei de koel Garzweiler II en woar oersjpronkelig óngerdeel van e groeëter gebeed wat weëd aafgegrave vuur de winning van broenkoale. In 2022 woeëd evvel besjlote um in 2030 te sjtoppe mit de broenkoalwinning, woeëdurch 't dörpke neet mieë gesjloop geet weëde. 't Ligk kótbei Ober- en Unterwestrich, Kuckum en Wanlo. Get wiejer in zuudwestlige en zuudlige richting ligke Berveroa, Kukhaove en Holzweiler. De dörpkes Borschemich (oeës) en Lutseroa (wiejer noa 't zuudoeëste) zint inmiddels verdwene.

In 2008 houw 't 882 iwuuenesj en in 2022 nog 150. Direk ten noorde va g'n sjtad Erkelens woeëd e compleet nui dörp oet d'r grónk gesjtamp. Dit sjtadsdeel grens aan 't nui Borschemich, Berveroa, Westrich en Kuckum en heesj officieel Keyenberg (neu). Doadurch gieëf 't i g'n gemingde Erkelens noe twieë plaatsje mit d'rzelfde naam. In Nui-Keyeberg goof 't in 2022 416 iwuuenesj.

De plaatsj woeëd in 893 vuur 't ieësj in 'n oerkonde geneumd. Zie heesjde doe Cheyenburghc en in 1381 Keyenberch. Naamgeëver woar 'n burch die direk ten noorde van 't dörp ligk (Haus Keyenberg). 't Geboew loog evvel neet óp 'ne berg of 'n huuevel, mar langs 't reveerke de Niers. In de middelieëwe goof 't ooch noch 'n twieëde burch (Haus Patteren). Die loog get ten weste van Haus Keyenberg en doava is, behaove de motte en get fundamente, nieks mieë uuever.

Ieëwelank hat 't dörp tot 't hertogdóm Jöllesch gehuurd. In d'r Tachetigjöarige Kreeg houw 't dörp regelmieësig te make mit invalle va Sjpaanse soldoate. In d'r Dartigjöarige Kreeg woeëde versjeie geboewe, woe-ónger Haus Patteren, kepotgesjoate durch Hessisje troepe. Noa d'r Franzuuesisje tied ging 't definitief uuever noa Pruse.

Óp d'r 27e fibberwaar 1945 woeëd Keyeberg veroverd durch de Amerikane in 't kader van Operation Grenade.

't Is wie alle dörper in de wiej umgeëving e agrarisj dörpke mit e aantal höaf. 't Ouw dörp is de letste joare gans gesjpaard geblieëve van d'r sjloop.

De vuurmalige Hl. Kruutskirk va Keyeberg
Hoes Keyeberg
Nui-Keyeberg