Kestieël 't Gäötje

Dit artikel is gesjreve in 't Gelaens. Ómdat 't plaatsgebónge is, maogs doe 't ómzètte nao 't Oeas, es te dit dialek sjpriks.

Kesjteël 't Geudje (plaatsjelik ’t Gäötje), ouch waal Hoes Hasselholt geneump, is gelaege aan de randj van 't Nederlands Limburgse dörp Ohé, 'n deil van Ohé en Laak, dat taengewoordig 'n deil is van de gemeinte Maasgoew.

Besjrieving van 't kesjteël

't Kesjteël besjteit oet 'n tweëlaogs hoofgeboew mèt 'ne lieëgere oetboew aan de noordkantj en is veurzeen van 'n zadeldaak op 'n nètgewelf. Aansjlutend op 't hoofgeboew en de oetboew sjteit 'ne achhokige taore mèt 'ne taoresjpits. 't Hoofgeboew is opgetrokke oet mergelsjtein en haet aan allebei de oeteinje 'ne trapgevel mèt euverhookse pinakels en laatgotische korfbaognisse. 't Vermoedelike boewjaor is 1548 getuige 'n gedateerd alliantiewaope van de boewers van 't kesjteël. De zudelike baksjteine langsgevel in Maaslandse Renaissance sjtiel dreug de jaortalankersj 1651, 't jaor wo-in deze vermoedelik is vernuujd.

De taore is in 1972 geboewd op de restante van 'ne woontaore dae veur de boew van 't kesjteël op dees plek zou höbbe gesjtaon. Opvallend zint de hèlsjteine kruusvinsters mèt hèlsjteine ómliesting en wovan de horizontale bènj door de ganse moer loupe.

De haoks op 't hoofgeboew gelaege noordelike vleugel is, volges jaortalankers aan de oaskantj, in 1629 geboewd. Deze vleugel haet 'ne vakwerkbaoveboew aan de zieje van de bènneplaatsj.

't Interieur van 't kesjteël haet 'n 17e eëuwse sjouw mèt kariatiden en 'ne 18e eëuwse sjaorsjteinmantjel mèt sjtöcwerk.

Gesjiedenis en beweuners

De veurlouper van 't kesjteëlke is waarsjienlik 'ne veerkantje woontaore oet vakwerk gewaes. Toen Catharina Hillen in 1544 trouwde mèt Lodewijk In der Horst van 't kesjteël Hattem bie Remunj, hèj zie 'ne veurkeur óm op 't plattelandj te gaon wone en neet in 't drökke Remunj. Daoróm leet 't echpaar 't kesjteël bie Ohé boewe, op de plaatsj van dèn awwe woontaore. 't Woort 'n luxueus en comfortabel boetehoes. 't Echpaar leet 't alliantiewaope aanbrènge in de gevel. In tweëde instantie leet 't echpaar nog 'ne traptaore toevoge. Later woort 't kesjteël bewoond door Hartwijck van Spee, de drossaard van Montfort. Hae leet 't kesjteël oetbreijde mèt de noordvleugel. In 1770 woorte de traptaore en de topgevel aan de hoafkanj verwiejere en kreeg 't kesjteël hieveur 'n sjuin daak in de plaatsj.

't Heje

In 1969 kaom 't kesjteël in bezit van baron J. van Hövell tot Wsterflier, sjtadsarchivaris van Remunj. Hae leet in 1970 'n oetgebreide resteratie oetveure, wobie de achkantige taore woort biegeboewd.