Kesjtieël Holtmühle

Dit artikel is gesjreve (of begós) in 't Tegels. Laes hie wie v'r mit de versjillende saorte Limburgs ómgaon.

---

Beejgeboew van kesjtieël Holtmühle

Kesjtieël Holtmühle is gelaege in de Nederlands Limburgse plaatsj Tegele, die allewiel deil oetmaak van de gemeinte Venlo.

Besjrieving van ’t kesjtieël

't Kesjtieëlcomplex sjtamt oet de zaevetienden ieëw. 't Hoofgeboew is 'n sjtreng classicistisch baksjteine geboew mit twieë oetsjpringende taorepaviljoens. De deurómliestinge zint in helsjtein oetgeveurd. 't Geboew vertuuënt wat sjtiel betrèf euvereinkómste mit 't kesjtieël van Ameronge, al is Holtmühle waal kleiner en door de taore-echtige hookpaviljoens ouch frivoler. Beej 't kesjtieëlcomplex behuuërt ein van de wennige gehieël bewaard geblaeve tiendsjure in Nederland. Wiejer besjteit 't complex oet twieë alleinsjtaonde paortgeboewe: de Kaldekirkse Paort en de Venlose Paort en ennige beejgeboewe, tuine, grachte, vievers en lanjerieje.

Gesjiedenis en beweuners

Kesjtieël Holtmühle is in oersjpróng beejnao 700 jaore aad. In 't hudige zaevetieënden ieëwse hoofgeboew zeen namelik fragmente van 'n ajer geboew opgenaome. De bekindste beweuner van Holtmühle waar de roemruchte Baron von Glasenapp, dae sjtórf in 1800. 't Kesjtieël waar tiedes zeen lang gesjiedenis in heng van ennige roemruchte adelike gesjlechte zoa-wie Metternich en de patricische femilie Van Basten Batenburg.

’t Hede

Nao 'n ómvangrieke resteratie in 1993 is in 't complex 'n hotel-resterant gevestig. Róngóm 't Château de Holtmühle zint fraaj kesjtieëltuine in diverse sjtiele te bewóngere.

Externe link

• Website "Stichting Limburgse Kastelen"