Jack Poels
- Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Amerikaans, es te dit dialek sjpriks.
Jack Poels (Sevenum, 27 juni 1957) is de zenger en gitaris vaan de Limburgse dialekband Rowwen Hèze. Poels sjrijf 't groetste deil vaan de meziek en de tekste veur de band. De meziek dee heer maak is 'n mingeling vaan (Ierse) folk, tex-mex en traditionele (Spaanse/Mexicaanse) accordeonmeziek.
Poels späölt gitaar (aofwisselend elektrisch en akoestisch) en mondharmonica. Heer sjrijf ouch tekste euver zie persoenlek leve: op 't album Vandaag (2001) vaan Rowwen Hèze zingk heer euver zien pasgebore keend. Op 't album Dageraad (2003) zingk heer euver de sjeiing vaan zien vrouw en de geveules die dat mèt ziech mètbrach. 't Nuiste album Rodus en Lucius geit 'r euver wie zien privéleve nao ziene sjeiing en e aontal meujlekere jaore weer trök op de rails is.
De aofgeloupe paar jaor maak de Americaan ouch furore es sjèlder. Heer oontworp al 't "Rowwen Hèze symbool" wat te zien is op de kaf vaan de ierste Rowwen Hèze-cd Blieve Loëpe; 't Amerikaans vrijheidsbeeld mèt 'n sigrèt, 'ne kloomp en 'ne pot beer. Ouch 't oontwerp vaan de hoes vaan 't album Dageraad, 'n groete gelöksknikker, kump vaan zien hand.
Dao neve is Poels vanaof 2003 same mèt Leon Giesen, aajd-bassis vaan oonder mier Toontje Lager, en 'n aontal aander muzikante aktief in 't projek "Holland America Lijn".
Op 27 april 2007 woort Jack Poels beneump tot Ridder in de Orde vaan Oranje-Nassau. In 1996 woort hae óngersjeije mèt de Orde van de Gulden Humor, 'ne pries van de gezamelike Limburgse carnavalsvereiniginge. Openbaar-vervoerbedrief Veolia verneumpde ein vaan häör Velios-treine nao Poels.