Hamburger
Dit artikel is gesjreve (of begós) in 't Breuker. Laes hie wie v'r mit de versjillende saorte Limburgs ómgaon.
'ne Hamburger is 'n bruuëdje mit 'n sjief gehak vlaesj, dat dèks verkoch waert es zoegenaamd "fastfood".
De historie van d'r hamburger is neet gans dudelik, allewaal zieëker is dat 't woerddael "ham" nieks te make haat mit sjink ("ham" in 't Ingelsj en Nederlands). D'r hamburger wie vier 'm huuj d'r daag kinne, woert waarsjienlik vuur 't ieësj bereid in de Duutsje sjtad Hamburg. Duutsje emigrante höbbe dit concep mitgenómme nao de Vereinigde Sjtate, woe d'r moderne hamburger is óntsjtange.
't Gieëft 'ne haop variante. Oersjprunkelik woert allein rindvlaesj gebroek, meh huuj d'r daag waere aoch hoondervlaesj, paerdsvlaesj en verkesvlaesj in hamburgers verwirk. Aoch gieëft 't hamburgers van allein hoondervlaesj en besjtónt vegetarische versies. Klassieke hamburgers waere gebraoë, meh sómmige gefrituurd en lieke mieë op platte frikandelle. 'ne Cheeseburger is 'ne bekinde variant woebie me 't bruuëdje belèkt mit 'n pleksjke kieës. Anger populair belèk is mósterd, ketchup, un, kómkómmer, tomaat en sjlaat.
Hamburgers waere dèks gegaeëte same mit friete of anger fastfood. De mieës bekinde hamburgerrestaurants zint Burger King en McDonald's. Hamburgers waere aoch verkoch bie fritures.