Hais Chambille
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Hais Chambille waor 'ne Mestreechteneer vaan geboorte (20 februari 1921) meh woende 'n groet deil vaan zien leve (vaanaof 1954) in Valkenberg, boe heer in 1957 directeur woort van de Leeuw-beerbrouwerij es opvolger van ziene pa. In Gent studeerde heer aof aon de technische brouwerijsjaol. Hais Chambille waor evels 'nen echte Mestreechteneer. Wie zien ierste kind woort gebore, wèrkde heer in Amsterdam bij de Heineken-brouwerij, meh veur de bevalling is zien vrouw, Annie Brounts, nao Mestreech gekoume, want dao woort gezag: "Geinen Hollender in de familie". Bij zien pensionering is heer weer in Mestreech, op St. Pieter, goon woene. Heer is gestorve op 13 april 2002.
Besjtuursfuncties
bewirkHais waor jaorelaank hoofbestuurslid vaan Veldeke Limburg en vaan de krink Veldeke-Valkeberg. Ouch zaot heer in 't bestuur vaan de N.U.L., de Narrenuniversiteit Limburg en waor prizzedent van de fanfare St. Joezep in Mestreech. In Valkenberg waor heer veurzitter vaan de Catacombestiechting.
Oondersjeiinge
bewirkIn 1986 kreeg Hais Chambille de cultuurpries vaan de NV Koninklijke Sphinx. In datzelfde jaor woort heer ridder in de Orde van Oranje Nassau. Veur zienen inzat veur de Limburgse taol en volkscultuur kraog heer in 1987 de Orde van de Gulden Humor. In de Gemeintegrot aon de Cauberg in Valkenberg is 'n portrèt vaan häöm geteikend.
Werk
bewirk- In 1941 versjeen 'ne bundel "Mastreechter versjkes en leedsjes", opgedrage aon ziene pa, de Mestreechsen diechter Paul Chambille de Beaumont.
- In 1947 kaom 'ne bundel Mestreechse gediechte oet: "Sjöddeköl".